Jańa toqyma ónerkásibin damytý jol kartasy ázirlenedi

ASTANA. KAZINFORM – Jańa toqyma ónerkásibin damytý jónindegi 2026-2030 jyldarǵa arnalǵan jol kartasy ázirlenedi. Bul týraly Senat depýtattarynyń saýalyna Premer-mınıstr Oljas Bektenovtiń jaýabynda aıtylǵan.

- Salany odan ári damytý úshin klasterlik tásildi jáne tehnologııalyq jańǵyrtý sharalaryn kúsheıte otyryp, Jańa toqyma ónerkásibin damytý jónindegi 2026-2030 jyldarǵa arnalǵan jol kartasyn ázirleý kózdelgen. Maqta salasynyń tıimdiligin arttyrý maqsatynda Selektsııa jáne tuqym sharýashylyǵyn damytý jónindegi 2024-2028 jyldarǵa arnalǵan keshendi jospar aıasynda selektsııalyq baǵdarlamalardy qarjylandyrýdy 1,5-ten 7,5 mlrd teńgege deıin ulǵaıtý, 9 ǵylymı-tehnıkalyq jobany iske asyrý, onyń ishinde maqta selektsııasyn jáne bastapqy tuqym sharýashylyǵyn, jabdyqty jańartý jáne sheteldik uıymdardy tarta otyryp, mamandar daıarlaý, Túrkistan oblysynda maqta tuqymy zaýytyn jańǵyrtý (qýaty – jylyna 1,5 myń tonna, paıdalanýǵa berý – 2025 jyldyń sońy) sharalary josparlanǵan, - dedi Premer-mınıstr.

Sonymen qatar Úkimet basshysy senatorlardyń maqta ónimin satyp alý boıynsha turaqtandyrý qorlaryn qurýǵa qatysty usynysyna jaýap berdi.

- Turaqtandyrý qorlarynyń jumys isteý saıasaty óńirlerdiń tutyný naryǵynda azyq-túlik qaýipsizdigin jáne baǵanyń turaqtylyǵyn qamtamasyz etýge baǵyttalǵan. Basty mindet – birinshi kezekte qajetti áleýmettik mańyzy bar negizgi azyqtúlik taýarlaryna (nan, tuz, et, maı jáne t.b.) baǵanyń ósýine jedel áreket etý jáne olardyń tapshylyǵyna jol bermeý. Maqta ónimi birinshi kezekte qajetti taýarlar qataryna jatpaıtyndyqtan, ony satyp alý jónindegi jeke turaqtandyrý qoryn qurý orynsyz dep esepteımiz, - dedi Oljas Bektenov.

Buǵan deıin senator Murat Qadyrbek Úkimetke naryqtyq ekonomıkaǵa saı barlyq taraptyń quqyǵy qorǵalyp, ádil básekelestik pen sapaly ónim alý úshin arnaıy maqta salasyn damytý týraly zań ázirleýdi usynǵan edi.