Jańa temirjol jelileriniń qurylysyna 12,8 myńnan astam adam tartyldy
ASTANA. KAZINFORM — «Qazaqstan temir joly» UK» AQ iri ınfraqurylymdyq jobalaryn iske asyrý eleýli áleýmettik-ekonomıkalyq tıimdilikti qalyptastyrady. Jańa temirjol jelileriniń qurylysyna Qazaqstannyń ártúrli óńirlerinde 12,8 myńnan astam adam tikeleı tartylǵan. Bul týraly «Qazaqstan temir joly» UK» AQ baspasóz qyzmeti málimdedi.
Búgingi tańda Dostyq — Moıynty ýchaskesinde ekinshi joldardyń qurylysy aıaqtalýda. Almaty aınalasynda aınalma temir jol, Darbaza — Maqtaaral jáne Baqty — Aıagóz jelilerin salý jumystary jalǵasyp jatyr. Moıynty — Qyzyljar jańa jelisin salý jáne Altynkól — Jetigen ýchaskesin jańǵyrtý boıynsha jobalardy iske asyrý bastaldy.
— Qurylys protsesi temirjol tósemderin tóseýden bastap kópirler, energetıka, baılanys jáne avtomatıka obektilerin salýǵa deıingi jumystardyń keń spektrin qamtıdy. Túrli baǵyttaǵy mamandar — ınjenerler, jobalaýshylar, geodezıster, kópir salýshylar, jol salýshylar, energetıkter, baılanysshylar, arnaıy tehnıka júrgizýshileri jáne t. b. jumyldyrylǵan, — delingen habarlamada.
Bul jergilikti turǵyndardyń barynsha jumyspen qamtylýyn qamtamasyz etedi.Sonymen qatar, irgeles eldi mekenderde — turǵyn úı, tamaqtaný, kóliktik qyzmet kórsetý salasynda shaǵyn jáne orta bıznes qyzmetterine suranys artyp keledi, bul qosymsha jumys oryndaryn ashady jáne óńirler ekonomıkasynyń damýyn yntalandyrady.
Aýqymdy qurylys otandyq kompanııalarǵa jańa serpin berdi: óndiristik jáne tehnıkalyq qýattar kúsheıtildi, kadrlardyń biliktilik deńgeıi artty, qundy praktıkalyq tájirıbe jınaqtaldy.
Búgingi tańda temirjol salasynyń qurylys ujymdary joǵary quzyretke ıe jáne kez-kelgen kúrdeli jobalardy júzege asyra alady. Qurylys aıaqtalǵannan keıin temirjoldyń jańa ýchaskelerin paıdalaný jáne tehnıkalyq qyzmet kórsetý salasynda turaqty jumys oryndaryn qalyptastyrý kútiledi.
Aıta ketelik, transqazaqstandyq temirjol dálizin damytý jumystary aıasynda aýqymdy 3 joba júzege asady.