Jańa televızııalyq maýsym: «QAREKET» tok-shoýynyń formaty ózgeredi
ASTANA. QazAqparat - Búgin Astanada «Qazaqstan» teleradıokorporatsııasynyń kúzgi televızııalyq maýsymynyń tanystyrylymy ótti, dep habarlaıdy QazAqparat.
Atap aıtqanda, «Qazaqstan», «Qazsport» jáne «balapan» telearnalarynyń jetekshileri jańa maýsymdaǵy jobalarmen tanystyryp, bolashaqtaǵy josparlarymen bólisti.
Sonymen, qyrkúıek aıynda «Qazaqstan» arnasynyń jańa jobalary kórermenge jol tartatyn bolady. Máselen, tanymal «QAREKET» tok-shoýynyń formaty ózgeredi. Endi, Beısen Quranbekpen birge baǵdarlamany jańa júrgizýshiler, tanymal kásibı jýrnalıster: Serik Ábiken, Nurbol Batyrbaı, Dosan Qyzaıbek jáne Esbolat Aıdabosyn júrgizetin bolady.
Budan bólek, qyrkúıek aıynda kún saıyn shyǵatyn jańa otbasylyq «SHANYRAQ» tok-shoýynyń júrgizýshisi Juldyz Abdýkarımova bolmaq. Odan basqa, senbilik oıyn-saýyqtyq «QAIYRLY KESH, QAZAQSTAN!», densaýlyq salasyn taldaıtyn «SHIPAGER» tanymdyq baǵdarlamalary usynylatyn bolady. Taǵy da aıta ketetin jańalyq, «JAN JYLYY» atty áleýmettik joba efırge qaıta oralady.
Belgili bolǵandaı, jańa maýsym aıasynda kórermender «Otyńdy óshirme», «Kúı ǵumyr», «Keıki mergen», «Abysyndar», «Janym meniń», «Raýan», «Ósıet», «Armanǵa 20 qadam», «Shyraǵym» atty jańa otandyq telehıkaıalardy, «Jańa qonys», «Kózaıym» týyndylarynyń úshinshi maýsymyn tamashalaıtyn bolady. Sonymen qatar, derekti fılmder tizbegi «Uly dala ulaǵaty», «Kóshpendiler», «Vırtýaldy soǵystyń jazbalary», «Aqqan juldyz» jáne basqa da týyndylarmen tolyqtyrylmaq.
Jańa maýsymǵa «Balapan» arnasy kishkentaı kórermenderine kóptegen anımatsııalyq serıaldar, ǵylymı-tanymdyq, saýyqtyq jobalar toptamasyn daıyndady. Bıylǵy jyly anımatsııalyq fılmder kólemi anaǵurlym artqandyǵy habarlandy. Telearna óz kórermenderine «Ertemir», «Aıdar», «Dala oıyndary», «Shahmat patshalyǵy», «Qońyr qaz», «Erkeler», «Babalar sózi», «Dara tulǵa», «Kel, shyrqaıyq» sııaqty 10 anımatsııalyq serıal ázirledi.
Munymen qosa, «Qazaqstan» jáne «Qazsport» arnalarynyń jańa televızııalyq maýsymynyń negizgi jańalyǵy - «Qazaqstan FIGHTER» biregeı realıtı-shoýy. Joba maqsaty - sport pen básekelestik rýhty, salaýatty ómir saltyn damytýmen qatar, MMA kásibı sport túrin keńinen nasıhattaý. Mundaı biregeı joba qazaqstandyq televızııa naryǵynda alǵash ret usynylmaq. Ádilqazylar quramyn tanymal sportshylar, bapkerler, Olımpıada chempıondary quraıdy.
«Qazsport» telearnasy sport álemindegi basty jáne aýqymdy sharalardy kórsetýdi jalǵastyrady. Odan bólek, telearna ulttyq sport túrlerin nasıhattap qana qoımaı, kórsetilimderiniń kólemin ulǵaıtýdy kózdep otyr.
Taǵy bir jańalyq, kúzgi maýsymda «Qazaqstan» teleradıokorporatsııasynyń quramyna taǵy da bir jańa «Tamasha tv» telearnasy qosyldy. Telearna efıri korporatsııanyń ishki teleónimderimen tolyqtyrylatyn bolady. Aıta ketsek, «Ázil álemi» «Jaıdarman», «Haha-shoý», «Ázil Man», «Kóńildi tapqyrlar alańy», «Qyzyq eken», komedııalyq telehıkaıalar jáne ózge de qyzyqty baǵdarlamalar kópshilik nazaryna usynylmaq.
