Jańa tehnologııalardy engizgen mashına jasaýshylardy memleket qoldaıdy - forým
ASTANA. QazAqparat - Qazaqstan Úkimeti ónim eksportyn arttyratyn mashına jasaý kásiporyndaryna memlekettik qoldaýdy usyndy, dep habarlaıdy QazAqparat.
Astanadaǵy Qazaqstan mashına jasaýshylarynyń VI Forýmynda baıandama jasaǵan QR Investıtsııalar jáne damý mınıstri Jeńis Qasymbektiń aıtýynsha, búginde Úkimettiń tapsyrmasy boıynsha Mashına jasaýshylar odaǵymen birlesip, 2019-2030 jyldarǵa arnalǵan mashına jasaýdy damytýdyń keshendi josparynyń jobasy ázirlendi.
Onyń maqsaty - otandyq mashına jasaý salasynda básekege qabilettilikti arttyrý, ishki naryqty qazaqstandyq ónimmen qamtamasyz etý, sondaı-aq eksport deńgeıin kóterý.
«Jospar aıasynda qoldaýdyń qarjylyq sharalary da qarastyrylýda. Sonymen birge, memlekettik qoldaýdyń usynylǵan sharalaryna jaýap retinde bıznes tarapy naqty kórsetkishterge jetý boıynsha mindettemeni ózine júkteýi tıis. Osy oraıda bıznes eksportty, eńbek ónimdiligin arttyrý sekildi qadamdardy júzege asyrady. Mundaı mindettemelerdi alýǵa, tehnıkalyq jańarýǵa qarjy salýǵa daıyn jáne jahandyq naryqtarǵa shyǵýǵa ázir kásiporyndarǵa jan-jaqty memlekettik qoldaý jasalady», - dedi vedomstvo basshysy.
Budan buryn habarlanǵandaı, Astanadaǵy EXPO Kongress-ortalyǵynda Qazaqstan mashına jasaýshylarynyń VI Forýmy ótip jatyr.
Jeńis Qasymbektiń sózine qaraǵanda, 2018 jyldyń 8 aıynyń qorytyndysy boıynsha satylǵan árbir ekinshi avtomobıl otandyq óndiriske tıesili.
