Jańa tehnologııalardy ázirleýshi elder avtorlyq quqyqtarmen qorǵanyp otyr - Elbasy

ASTANA. QazAqparat - Jańa tehnologııalardy ázirleýshi elder avtorlyq quqyqtarmen jáne patenttermen qorǵanyp otyr. Bul týraly búgin H Astana ekonomıkalyq forýmynyń jalpy otyrysynda sóz sóılegen QR Prezıdenti Nursultan Nazarbaev aıtty, dep habarlaıdy QazAqparat.

«Ósim jańa modeliniń basty elementi - damýshy elderdi jedeldetilgen turaqty damýǵa tartý bolýy tıis. Búgingi kúni jańa tehnologııalardy ázirleýshi elder avtorlyq quqyqtarmen jáne patenttermen qorǵanyp otyr. Bul ǵylymı jáne qarjylyq resýrstary jetkiliksiz elderdi odan ary artta qala  berýine túrtki bolady. Bul máselede jasandy kedergiler bolmaýy tıis», - dedi Qazaqstan Prezıdenti.

Osy oraıda Memleket basshysy álemde bir jarym mıllıard adam elektr jaryǵynsyz, úsh mıllıardqa jýyq adam sý tapshylyǵy jaǵdaıynda ómir súrip otyrǵandyǵyn basa aıtyp ótti.

«Mundaı jaǵdaı jer betindegi jappaı kóshi-qondy odan ary órshite túsedi. Sondyqtan elderdiń derbes damýyna jáne olardy jaıly ómir súretin orynǵa aınaldyrý úshin jaǵdaı jasaý mańyzdy bolmaq. Qazaqstan kezeń-kezeńimen turaqty damýǵa baǵyttalǵan reformalar júrgizýdi jaqtaýshy boldy jáne bolyp qala da beredi. Bizdiń negizgi maqsatymyz sapaly ósim, damyǵan otyz eldiń qataryna kirý», - dedi Nursultan Nazarbaev.