«Jańa tehnologııalardan qalyp qoımaý – búgingi kúnniń basty talaby» - respýblıkalyq basylymdarǵa sholý
***
Keshe Táýelsizdik saraıynda 7-shi Búkilálemdik Islam ekonomıkalyq forýmynyń jumysy ári qaraı jalǵasty. Osyǵan oraı «Egemen Qazaqstan» gazetinde «Jańa tehnologııalardan qalyp qoımaý - búgingi kúnniń basty talaby» degen taqyryppen kólemdi maqala jarııalandy. Basylymnyń atap ótýinshe, forýmnyń túske deıingi plenarlyq otyrystarynda Sheksiz múmkindik úshin ınnovatsııalyq tehnologııalardy qoldaný; Infraqurylymdy damytý: bolashaqtaǵy ınvestıtsııalar; Shaǵyn jáne orta bıznestegi ınvestıtsııalar: ekonomıkalyq damýǵa yqpaly; Azyq-túlik qaýipsizdigi: saýda men áleýmettik qajettilik arasyndaǵy balans; Halal: álemdik ekonomıkalyq júıedegi halaldyń áleýeti jáne balamaly energııa túrleri: taza, jasyl, qaýipsiz degen taqyryptar boıynsha máseleler ortaǵa salynyp, pikirler almasyldy.
«Egemen Qazaqstan» gazetiniń jazýynsha, keshe Parlament Senatynyń Tóraǵasy Qaırat Mámı TMD-ǵa qatysýshy memleketter Parlamentaralyq Assambleıasy Keńesiniń Bas hatshysy Mıhaıl Krotovpen kezdesti. Kezdesý barysynda Q.Mámı bıylǵy 15-17 mamyrda Sankt-Peterborda ótken, Senat delegatsııasy qatysqan TMD jáne EýrAzEQ Parlamentaralyq Assambleıalary men UQShU Parlamenttik Assambleıasy is-sharalarynyń qorytyndylaryn joǵary baǵalady. Tóraǵanyń pikirinshe, TMD elderi parlamentshileriniń ózara tyǵyz is-qımyly Dostastyq memleketteriniń yntymaqtastyǵyn odan ári nyǵaıta túsýge yqpal etetin bolady.
***
«Іle Alataýyndaǵy Medeý shatqalynda 17 mamyr kúni bolǵan dúleı daýyldyń zardaptaryn qalpyna keltirý jumystaryn baqylaý maqsatynda keshe Aýyl sharýashylyq mınıstri Asyljan Mamytbekov, Orman sharýashylyǵy komıtetiniń tóraǵasy Erlan Nysanbaev jumys saparymen Almatyǵa keldi», - dep jazady «Aıqyn» gazeti. Basylymnyń málimetterine sáıkes, syńsyǵan shyrshalarynan aıyrylyp, jalańashtanyp qalǵan taý betkeılerin burynǵy qalpyna keltirý úshin az degende elý, áıtpese júz jyl ýaqyt kerek. Al betkeılerin qulaǵan shyrshalardan tazartýǵa tikushaq yńǵaıly-aq, biraq ony paıdalaný bizge qymbatqa túseıin dep tur. Tikushaqtyń bir saǵat jumys istegenine jarty mıllıon teńge suraıdy.
Parıjdegi «Rolan Garros» týrnıri aıaqtalǵan bette tennısshilerdiń dúnıejúzilik reıtıngine qaıta ózgeris engizildi. Jasyratyny joq, «Úlken dýlyǵa» sanatyna jatatyn dúbirli dodada jaqsy óner kórsetkenderdiń mártebesi birshama ósti. Olar mol kólemde syıaqy alýmen qatar, saıys kestesindegi jaǵdaılaryn ájeptáýir jaqsartyp aldy. Qazir olar úlde men búldege oranýda. Al atalmysh jarys barysynda sátsizdikke ushyraǵandar, kerisinshe, búgingi kúni barmaqtaryn tistep otyr. Bul jaıynda «Aıqyn» gazetindegi «Kósh basynda - kúshtiler» degen maqaladan bile alasyzdar.
***
«Baıqońyr» máselesi, ondaǵy Alash azamattarynyń Konstıtýtsııamen kepildengen quqyn qorǵaý jaıy sóz bolǵan Senattyń keshegi otyrysynda eldiń egemendigine qatysty áńgime biraz jerge baryp qaldy», - dep jazady «Alash aınasy» gazeti. Qazaqstan men Reseı arasyndaǵy «Baıqońyr» keshenin jalǵa berý shartyna ózgeris engizý týraly hattamany talqylaý barysynda senator Qýanysh Sultanov bastaǵan halyq qalaýlylary qujattyń normasy «el egemendigine nuqsan keltiredi» dep shyryldap baqqan. Áıtse de palatanyń basym kópshilik depýtaty «túk te etpeıdi» degenge salyp, qujatty qabyldatyp tastapty. Bul jaıynda tereńirek «Senatorlardyń Baıqońyrǵa emes, reseılik qylmyskerge jany ashyǵany qalaı?» degen maqaladan oqısyzdar.
Tumaý degen derttiń ózi neshe atasy bary belgisiz. Belgilisi sol - aýrýdyń bul túri ár jyly árqıly sıpatta keletini. Biraq bizdiń aıtpaǵymyz ol emes. Aıtaıyn degenimiz, sýyq tıip nemese vırýs juqtyrý arqyly tumaýratyp qalsańyz, murnyńyz bitip, qulaǵyńyz tunatyny, keıde oǵan jutqynshaǵyńyz da isinip, bir jaǵynan qosylatyny bar. Mundaıda eriksiz aýrýhanaǵa barsańyz, aıtýǵa til kúrmeletin otorınolarıngolog degen mamanǵa jiberedi. Aýyz-qulaq-muryndy tóńirekteıtin aýrýlardyń arnaıy dárigeri - osy. Álbette, bul dáriger tumaýdy emdeıdi dep túsinýge bolmaıdy, ol adamnyń jalpy osy múshelerine qatysty aýrýlarǵa mamandanǵan dáriger. Keshe Astanada osy otandyq otorınolarıngolog dárigerler bas qosyp, Táýelsiz Qazaqstan tarıhyndaǵy I sezin ashty. Atalǵan alqaly jıyn jaıy «Alash aınasy» gazetiniń juma kúngi nómirindegi «Ataýy til kúrmeıtin dárigerler sezi ashyldy» degen maqalada keńinen baıandalǵan.
***
«Kazahstanskaıa pravda» gazetiniń jazýynsha, Parlament Májilisiniń Tóraǵasy Oral Muhamedjanov TMD Parlamentaralyq Assambleıasynyń Bas hatshysy - Hatshylyq keńesiniń jetekshisi Mıhaıl Krotovty jáne TMD Parlamentaralyq Assambleıasy Bas hatshysynyń orynbasary, Qazaqstan Respýblıkasy Parlamentiniń TMD PAA, EýrAzEQ PAA jáne UQShU PA ókili Halel Bákenovti qabyldady. M.Krotov Májilis Tóraǵasyn TMD PAA Bas hatshysynyń Qazaqstanǵa jasaǵan sapary barysynda qol qoıylýǵa tıisti Ál-Farabı atyndaǵy Qazaq ulttyq ýnıversıteti men L.N.Gýmılev atyndaǵy Eýrazııa ulttyq ýnıversıteti jáne TMD PAA arasyndaǵy yntymaqtastyq týraly kelisim-shart jobalarymen tanystyrdy.
