Jańa tehnologııalar salasynda qazaq tiline suranys óte joǵary – Baǵdat Mýsın
ASTANA. KAZINFORM - Jańa tehnologııalar salasynda qazaq tiline suranys óte joǵary. Buǵan OpenAI derekteri dálel. Sońǵy jyldary qazaq tili ChatGPT-di qoldanatyn belsendi paıdalanýshylardyń úlesi eń jyldam ósken tilderdiń qataryna endi.
Bul týraly óziniń Telegram paraqshasynda «Qazaqtelekom» AQ basqarma tóraǵasy Baǵdat Mýsın jazdy.
Onyń aıtýynsha, OpenAI men Halyqaralyq «Qazaq tili» qoǵamynyń birlesken jobasy aıasynda 14 mlrd tokennen turatyn mátindik baza jáne 12 myń saǵattyq aýdıoderek jınaldy.
-Bul neni kórsetedi? Adamdar jasandy ıntellektini qazaq tilinde paıdalanǵysy keledi. Endi bizdiń mindetimiz – tehnologııalardyń sapasyn osy suranysqa saı damytý. Búgin Digital Bridge forýmynda «Qazaqtelekom», Halyqaralyq «Qazaq tili» qoǵamy jáne amerıkalyq FireBird AI kompanııasy jasandy ıntellekt salasynda yntymaqtastyq týraly memorandýmǵa qol qoıdy,-deıdi Basqarma tóraǵasy.
Onyń sózinshe, FireBird AI álemniń jetekshi tehnologııalyq seriktesterimen birge joǵary ónimdi esepteý ınfraqurylymyn damytyp keledi.
-Birlesip, jasandy ıntellektiniń qazaq tilin jaqsy túsinýine jáne qazaqsha sapaly jumys isteýine baǵyttalǵan zertteýler men jobalardy qolǵa alamyz. Biz óz tarapymyzdan tehnologııalyq jáne tsıfrlyq ınfraqurylymymyzdy usynýǵa daıynbyz. Bul jumystyń taǵy bir mańyzdy baǵyty – otandyq IT mamandaryna qoldaý kórsetý,-deıdi ol.
Baǵdat Mýsınniń aıtýynsha, qazaqstandyq ázirleýshiler ózderiniń AI ónimderin jasaı alýy úshin olarǵa qajetti derekter, quraldar men tehnıkalyq múmkindikter kerek. Til qoldanylǵan jerde damıdy. Búginde jasandy ıntellekt, daýystyq kómekshiler men AI agentter ómirimizge enip jatyr. Qazaq tili de osy jańa tehnologııalardyń tiline aınalýy tıis.
Osyǵan deıin Qazaqstan energetıkalyq áleýetin, telekommýnıkatsııalyq ınfraqurylymyn jáne halyqaralyq tsıfrlyq baılanystaryn paıdalana otyryp, jasandy ıntellekt salasyndaǵy esepteý qýatyn damytýdy kózdeıtini týraly jazdyq.
