Jańa tehnologııalar esebinen Reseıden elektr energııasyn ımporttaý qajettiligi tómendetiledi — mınıstrlik

ASTANA. KAZINFORM — Búgin Májiliste Energetıka vıtse-mınıstri Suńǵat Esimhanov keıbir zańnamalyq aktilerge balamaly energııa kózderin damytý máseleleri boıynsha ózgerister men tolyqtyrýlar engizýdi kózdeıtin zań jobasyn tanystyrdy. 

Onyń aıtýynsha, zań jobasy energııa jınaqtaý júıelerin retteýdiń jańa modelin engizýdi kózdeıdi. Oǵan sáıkes jobalardy irikteý qýattylyq naryǵynda aýktsıondar arqyly júzege asyrylady. Mundaı júıelerdi engizý kólemderi KEGOC júıelik operatorymen birlesip, energııa júıesiniń naqty qajettilikterine qaraı aıqyndalady.

— Aǵymdaǵy baǵalaýlarǵa sáıkes, energııa júıesiniń energııa jınaqtaý júıelerine degen qajettiligi shamamen 3 GVt-ty quraıdy. Onyń ishinde úkimetaralyq kelisimder aıasynda iske asyrylatyn jobalar boıynsha shamamen 1,4 GVt engizý josparlanǵan. Energııa jınaqtaý júıeleri energııa júıesin teńgerimdeýdiń, onyń ornyqtylyǵyn arttyrýdyń jáne jańartylatyn energııa kózderin ıntegratsııalaýdyń negizgi quraly retinde qarastyrylady. Osy júıeler úshin 15 jylǵa deıingi merzimge jasalatyn uzaq merzimdi sharttar negizinde biryńǵaı satyp alýshy tóleıtin qýattyń qoljetimdiligi úshin qyzmet engiziledi, — dedi vıtse-mınıstr.

Suńǵat Esimhanovtyń sózine qaraǵanda, energııa jınaqtaý júıelerin paıdalaný eń joǵary júkteme saǵattarynda elektr energııasyn berýge múmkindik beredi. Reseı Federatsııasynan elektr energııasyn ımporttaý qajettiligin tómendetedi. Elektrmen jabdyqtaýdyń senimdiligin arttyrady jáne túpkilikti tutynýshylar úshin elektr energııasynyń qunynyń ósýine ákelmeı, tutastaı alǵanda energııa júıesi úshin oń ekonomıkalyq áser qalyptastyrady.

Buǵan deıin Energetıka mınıstrligi eldegi energetıkalyq kásiporyndarda qosymsha qýattardy engizý jáne jumys istep turǵan qýattardy qalpyna keltirý máselesin pysyqtap jatqanyn jazǵan edik.