Jańa taý shańǵysy kýrorty: Almatyda 5 myńnan astam jumys orny ashylady
ASTANA. KAZINFORM — Almaty Superski jańa taý shańǵysy kýrorty aımaqqa shetelden jańadan úırenip júrgen shańǵyshylar men týrısterdi tartýǵa baǵyttalǵan. Úkimet baspasóz qyzmetiniń habarlaýynsha, bul týraly Pas Grau International kompanııasynyń operatsııalyq dırektory Tomas Tor-Ensen málim etti.
Onyń aıtýynsha, kýrorttyń artyqshylyǵy — Almatyǵa jaqyn ornalasqanynda. Negizgi basymdyq qorshaǵan ortaǵa áserdi azaıtýǵa, ıaǵnı sý men elektr energııasyn tutynýdy azaıtýǵa múmkindik beretin jańa tehnologııalardy qoldanýǵa berilgen. Al «Medeý» bazalyq stansasyn kýrortpen baılanystyratyn zamanaýı aspaly jol jobanyń mańyzdy elementi bolady.
— Bolashaqta bul joba óńirge orasan zor ekonomıkalyq oń áser bermek, óıtkeni munda 5 myńnan astam jańa jumys ornyn ashýǵa múmkindik bar. Biz búkil jobany tutasymen qyzyqty dep sanaımyz. Ol kóptegen «jasyl» jáne «kók» trassalarda serýendeýge qolaıly jaǵdaı jasaı otyryp, ekologııa men turaqty damýdy, demalys pen kelýshilerdiń rahat sezimin keremet úılestiredi, — dep atap ótti Tomas Tor-Ensen.
Sheteldik týrısterdi, atap aıtqanda Qytaı men Úndistannyń iri naryqtarynan tartý strategııasyna erekshe nazar aýdarylyp otyr. Kýrort jańadan úırenip júrgen shańǵyshylarǵa baǵyttalǵan, sondaı-aq, ol bul aımaqta joq ónimdi usynady.
— Atalǵan jobanyń erekshe tusy — kýrorttyń eń bıik núktesi 3400 metr bıiktikte ornalasqanynda. Bul óte bıik jáne ol jerden taý ańǵary men Almaty qalasyna 360 gradýsqa keremet panoramalyq kórinis ashylady. Bul Úndistannan, Qytaıdan jáne basqa elderden keletin týrısterdi shynymen de qyzyqtyratyn dúnıe, — dep atap ótti Tomas Tor-Ensen.
Eske sala keteıik, Memleket basshysy Qasym-Jomart Toqaev bıylǵy «Jasandy ıntellekt dáýirindegi Qazaqstan: ózekti máseleler jáne ony túbegeıli tsıfrlyq ózgerister arqyly sheshý» atty Joldaýynda da elge týrıst tartý máselesine arnaıy toqtalǵan bolatyn.
— Shetelden týrıster tartý máselesi jáne otandyq týrızm saıasatyn zań turǵysynan qamtamasyz etý ortalyq organdardyń nazarynda bolady. Osy oraıda, Almaty qalasy men Almaty oblysyndaǵy taý týrızmi men taý shańǵysy týrızmine arnaıy toqtalǵym keledi. Qazirgi tańda bul baǵyttaǵy eń ózekti másele — zamanaýı ınfraqurylym salý. Eger osy mindetti oıdaǵydaı oryndasaq, elimizdiń kýrorttary jer júzine tanylyp, Qazaqstannyń betke ustar ulttyq brendi bolmaq, - dedi Prezıdent.
Aıta keteıik, Almatyda taý shańǵysy klasterin damytýǵa arnalǵan joba jańa kezeńge ótti.