Jańa tarıftiń engizilgendigine qaramastan, temirjol kóligi áli de básekege qabiletti - «Jolaýshylar tasymaly» AQ vıtse-prezıdenti
ASTANA. Qańtardyń 5-i. QazAqparat /Aıdar Ospanalıev/ - Temir joldaǵy jolaýshylar tasymalynyń baǵasy 10 paıyzǵa qymbattaǵanymen atalmysh saladaǵy kólikter ózge kóliktermen salystyrǵanda áli de bolsa básekege qabiletti.
Bul týraly aqparat quraldarynyń ókilderimen bolǵan baspasóz máslıhatynda «Jolaýshylar tasymaly» aktsıonerlik qoǵamynyń Qarjy jónindegi vıtse-prezıdenti Baǵlan Qapııasheva málim etti, dep habarlaıdy QazAqparat.
Onyń sózine qaraǵanda, elimizde tek temirjol arqyly ǵana jolaýshylar tasymaldaýǵa bolatyn aımaqtar bar. «Al bizdiń vagondarymyzdyń jolaýshylarmen qamtylý deńgeıi qys mezgilinde
eń kemi 65 paıyzdy quraıdy. Al jaz mezgilinde bul kórsetkish 90-nan asyp jyǵylady. Sondyqtan temirjol tasymalynyń qymbattaýymen jolaýshylar ózge kólikterge aýysa bastaıdy deýge eshqandaı negiz joq. Buǵan birneshe mysal keltirýge bolady. Aıtalyq, Astana-Qaraǵandy baǵyty boıynsha jeńil kólikterdiń baǵasy jaı kúnderi 600 al demalys kúnderi 800 teńgegeni qurasa, mereke kúnderi olardyń quny 1 myń 200 teńgege deıin kóteriledi. Al atalmysh baǵyt boıynsha temirjoldaǵy baǵa qazir 560 teńge bolsa, jańa tarıftiń qoldanysqa engizilýine oraı bul kórsetkish shamamen 620 teńge bolýy múmkin. ıAǵnı biz áli básekege qabilettimiz», dedi vıtse-prezıdent.
