Jańa taǵaıyndaýlar kezinde memlekettik organdarda «komandalyq aýysýǵa» tosqaýyl qoıyldy
ASTANA. 16 qyrkúıek. QazAqparat - Memlekettik organdardyń basshylaryn taǵaıyndaý kezindegi «komandalyq aýysýǵa» tosqaýyl qoıyldy. Bul týraly búgin QR Prezıdenti janyndaǵy Ortalyq kommýnıkatsııalar qyzmetindegi baspasóz máslıhatynda QR Memlekettik qyzmet isteri agenttiginiń tóraǵasy Álıhan Báımenov málim etti.
Agenttik basshysy Elbasy kadrlardyń «komandalyq aýysýdy» toqtatý týraly tapsyrma bergenin aıta kele: «Osyǵan oraı zańnamaǵa ózgerister engizilgennen keıin, ıaǵnı zańnamanyń pármendiligin sıpattaıtyn teńdesi joq kórsetkish - ol byltyrǵy jylmen salystyrǵan memlekettik organdar arasyndaǵy aýys-túıis 50 esege azaıdy», - dedi.
Aıta keteıik, buǵan deıin memlekettik organdardyń basshysy jańa qyzmetke taǵaıyndalǵannan keıin, ózimen birge vedomstvonyń ózge qyzmetkerlerin aýystyryp alatyn «komandalyq aýysý» tájirıbesi iske asyrylyp kelgen edi.
«Eger byltyr ekinshi toqsanda 3,5 myń taǵaıyndaý memlekettik organdar arasynda aýysym tártibimen bolsa, bıylǵy ekinshi toqsanda 65 taǵaıyndaý ǵana júzege asyryldy. Ol zańnyń kórsetilgen múmkindikteri aıasynda paıdalanyldy», - dedi Á. Báımenov.
