Jańa sý qoımalarynyń qurylysy qandaı nátıje beredi
ASTANA. KAZINFORM — QR Sý resýrstary jáne ırrıgatsııa mınıstrligi transshekaralyq sýǵa táýeldilikti azaıtý baǵytynda qandaı is-qımyldar jasap jatqanyn túsindirdi.
«Mınıstrlik 2030 jylǵa deıin sý sharýashylyǵy nysandaryn rekonstrýktsııalaýdyń keshendi josparyn ázirledi. Josparda jańadan 57 sý qoımasyn salý qarastyrylǵan. Onyń 20-sy sý resýrstaryn basqarýdy damytý tujyrymdamasynda da eskerilgen. Atap aıtqanda, Aqtóbe oblysynda tórt sý qoımasyn, Túrkistan jáne Jambyl oblystarynda úsh sý qoımasynan, Batys Qazaqstan, Shyǵys Qazaqstan jáne Qaraǵandy oblystarynda 2 sý qoımasynan, Aqmola, Almaty, Qyzylorda oblystarynda jáne Abaı oblystarynda bir-birden sý qoımasyn salý josparlanyp otyr», - delingen mınıstrliktiń Kazinform agenttigine bergen jaýabynda.
Bul turǵyda jańa sý qoımalary 2,5 mıllıard tekshe metrge deıin sý jınaı alady jáne olar sýarmaly jerlerdiń aýdanyn 250 myń gektarǵa ulǵaıtýǵa septigin tıgizedi.
«Sonymen qatar, elimizdegi jumys istep turǵan 15 sý qoımasyn rekonstrýktsııalaý qarastyrylǵan. Bul óz kezeginde 74 myń ga sýarmaly jerge sý berýdi jaqsartýǵa múmkindik beredi. Atalǵan sharalar bolashaqta sý resýrstaryn aıtarlyqtaı akkýmýlıatsııalap, aýyl sharýashylyǵy taýar óndirýshileriniń jáne de basqa da ekonomıka salalarynyń sýǵa degen suranysyn qanaǵattandyrýǵa jaǵdaı jasaıdy», - dep atalyp ótken vedomstvo aqparatynda.
