Jańa Sý kodeksinde sýdy únemdeý qaǵıdattary bekitiledi

NUR-SULTAN. QazAqparat – Jańa Sý kodeksinde sý resýrstaryn sarqylýdan jáne lastanýdan qorǵaýǵa basa mán beriledi. Bul týraly Sý kodeksi jobasyn qoǵamdyq talqylaýda aıtyldy, dep habarlaıdy QazAqparat tilshisi.

«Sý resýrstarynyń lastanýy men tıimsiz paıdalanylýy, sý paıdalanýdyń eskirgen tehnologııalary, sýdyń shekteýli bolýy men sarqylý qaýpi, transshekaralyq sýdy birlesip paıdalaný jáne qorǵaý máseleleri negizgi problemalar bolyp qala beredi. Qoldanystaǵy Sý kodeksi negizinen sý resýrstaryn sharýashylyqta paıdalanýǵa baǵyttalǵan, onda sý aýyl sharýashylyǵynda ekonomıkalyq paıda tabý quraly retinde qarastyrylady», - dedi Sý resýrstary komıteti sý qoryn paıdalaný jáne qorǵaý salasyndaǵy memlekettik baqylaý basqarmasynyń basshysy Marat Imanalıev.

Ázirlenip jatqan jańa Sý kodeksi jobasynda ekonomıkanyń barlyq salalarynda sýdy únemdeý qaǵıdattaryn bekitý usynylady.

«Jańa Sý kodeksiniń negizgi máni – sýdyń qorshaǵan ortanyń negizgi elementi ekenin, onyń ómir súrý úshin jáne adamnyń ekonomıkalyq qyzmetiniń barlyq túrinde qajettigin bekitý. Bul turǵyda sýdy sarqylýdan jáne lastanýdan qorǵaý - sý resýrstaryn basqarýdyń basty tásili bolady. Jobada baıandalǵan tujyrymdamalar negizinde birqatar negizgi problemalardy sheshý joldary usynylady», - dedi M. Imanálıev.

Aıta keteıik, Memleket basshysynyń bıylǵy 8 aqpandaǵy keńeıtilgen Úkimet otyrysyndaǵy tapsyrmasyna sáıkes jańa Sý kodeksi ázirlenip jatyr.

Foto: QR Ekologııa mınıstrliginiń baspasóz qyzmeti