Jańa standarttar Qazaqstan halqynyń ómir súrý sapasyn anyqtaıdy - senator A. Bıjanov
ASTANA. 25 qazan. QazAqparat - Qazaqstan halqynyń ómir súrý sapasyn anyqtaıtyn jańa standarttar ázirlendi. Bul týraly búgin Qazaqstandaǵy úzdik áleýmettik jobalarǵa arnalǵan respýblıkalyq konferentsııada QR Parlament Senaty mádenı-áleýmettik damý komıtetiniń tóraǵasy, depýtat Aqan Bıjanov málim etti.
Onyń habarlaýynsha, ómir súrý sapasynyń jańa standarttary Qazaqstandaǵy áleýmettik jańǵyrtýdyń negizgi kórsetkishteri bolmaq. «Qazirdiń ózinde atalǵan másele boıynsha eki zań jobasy bar. Onyń bireýi depýtattarǵa tıesili bolsa, ekinshisin Úkimet ázirlep shyqty. Aldaǵy ýaqytta atalǵan eki balamaly qujat Parlamentte, onyń ishinde tıisti komıtetterde qaralady dep senemiz», - deıdi A.Bıjanov. Senator atap kórsetkendeı, ómir súrý sapasynyń jańa standarttary jumys, taza aýyz sý, baspana, densaýlyq saqtaý men bilimmen qamtý sııaqty negizgi kórsetkishterdi aıqyndaıtyn bolady. Atalǵan standarttar zań júzinde bekitilgennen keıin barlyq memlekettik organdar sol boıynsha jumys isteýge mindetti bolmaq.
