Jańa standart: Keıbir mektepterde oqý pánderi biriktirilýi múmkin

ASTANA. KAZINFORM – Y.Altynsarın atyndaǵy Ulttyq bilim berý akademııasynyń vıtse-prezıdenti Rýslan Qaratabanov 2026 jyly qoldanysqa enetin jańartylǵan bilim standarty qaı pánderdi biriktirip oqytýǵa múmkindik beretinin aıtty.

- Búkil pán ornynda qalady. Sondyqtan hımııa, fızıka, bıologııa nemese matematıka pánderi joıylady degen qorqynysh bolmaý kerek.
Bir jaǵynan keıbir pánderdi biriktirip oqytqysy keletin mektepter bar. Jańa standart ondaı bastamalarǵa ruqsat beredi. ıAǵnı, ár mekteptiń ishki sheshimine baılanysty. Bir mektep fızıka, bıologııa, hımııa sııaqty pánderdi dástúrli qalpynda qaldyrǵysy kelse, jańa standart ol jaǵyn da qarastyrǵan. Soǵan saı oqý baǵdarlamasyn beredi. Al basqa bir mektep keıbir pánderdi biriktirip oqytqysy kelse, jańa standartta biriktirýge bolatyn pánderdiń tizbesi bekitilgen. Biriktirilgen pánder qalaı atalatyny da standartta kórsetilgen, - dedi ol Oqý-aǵartý mınıstrliginiń alqa májilisinde.

Akademııa ókili pánderdi biriktirý mindetti shara bolmaıtynyn, ár mekteptiń óz tańdaýyna baılanysty ekenin basa aıtty. Mysaly, dúnıejúzi tarıhy men quqyq negizderi áleýmettik ǵylymdar retinde, algebra men geometrııa matematıka páni retinde biriktirilýi múmkin.

- Pánderdiń mazmunyna kelsek, jańa standart ony sonshalyq ózgertken joq. Negizgi bólimderdiń bári sol kúıinde qaldy. Jalǵyz eskeretin dúnıe, keıbir tapsyrmalar jasandy ıntellekt múmkindikterine qaraı ózgertiledi. Bilim berýdiń memlekettik standarty ózgerse, oqýlyqtarda da ózgerister paıda bolatyny zańdylyq, - dedi Rýslan Qaratabanov.

Buǵan deıin 2026 jyldan bastap qaı pánderge jasandy ıntellekt quraldary engiziletini týraly jazǵan bolatynbyz.