Jańa standart: Qazaqstan mektepterine «álem ádebıeti» páni engizile me
ASTANA. KAZINFORM – 2025 jyly qaıta bekitilgen Bilim berý standarty el mektepterinde qazaq ádebıetimen qatar orys ádebıetin de ári qaraı oqyta berýdi kózdeıdi. Bul týraly Oqý-aǵartý mınıstrliginiń Kazinform saýalyna joldaǵan jaýabynda aıtylǵan.
- Oqý-aǵartý mınıstriniń 2025 jylǵy 23 qańtardaǵy №12 buıryǵymen bekitilgen memlekettik negizgi orta bilim berý standartyna sáıkes bilim berý uıymdary, qazaq ádebıeti, orys ádebıeti mindetti pánderimen qatar, álem ádebıetin oqytýdy varıatıvtik komponenti esebinen júzege asyrý múmkindigi qarastyrylǵan. Álem ádebıetin varıatıvti komponent saǵattary esebinen oqytylýy múmkin, - dep jazylǵan mınıstrlik málimetinde.
Al osy varıatıvti komponent (pedagogtiń qalaýy boıynsha sabaqtan tys oqýshylarmen júrgizetin shyǵarmashylyq jumysy) esebinen uıymdastyrylatyn álem ádebıeti pánin oqý baǵdarlamasyn muǵalim ózi ázirleý kerek.
- Qazirgi qoldanystaǵy memlekettik jalpyǵa mindetti bilim berý standarty boıynsha álem ádebıeti oqytylmaıdy. Varıatıvtik komponent esebinen júzege asyrý múmkindigi qarastyrylǵan jaǵdaıda varıatıvti komponenttiń kýrstary men pánderiniń baǵdarlamalaryn mektep muǵalimderi ázirleıdi. Al mektep oqýlyqtaryn daıarlaý jalpy bilim berý pánderi men tıptik oqý baǵdarlamalaryna sáıkes baspalar arqyly júzege asyrylady, - dep jazady mınıstrlik mamandary.
Buǵan deıin jańa Bilim berý standarty keıbir mektepterge oqý pánderi biriktirip oqytýǵa múmkindik beretinin jazǵan edik.