Jańa Stadler vagondary qashan qoldanysqa beriledi – Vıtse-mınıstr jaýaby
ASTANA. KAZINFORM — Qazaqstanda jańa Stadler vagondaryn qazan aıynyń sońy men qarasha aıynyń basynda paıdalanýǵa berý josparlanyp otyr. Bul týraly Úkimettegi brıfıngte Kólik vıtse-mınıstri Jánibek Taıjanov málimdedi.
Onyń aıtýynsha, vagondardyń bir bóligi qabyldanǵan. Qazir poıyzdardyń keıbir baǵyttary boıynsha synaq jumystary, sonyń ishinde tejeý júıesi men ózge de tehnıkalyq parametrler tekserilip jatyr.
— «QTJ» kompanııasynyń aldyn ala málimetine sáıkes, vagondardy paıdalanýǵa berý jáne Qazaqstanda jolaýshylar tasymalyna shyǵarý qazan aıynyń sońyna — qarasha aıynyń basyna josparlanyp otyr. Ol úshin barlyq synaq jumystary aıaqtalýy kerek, — dedi Jánibek Taıjanov.
Vıtse-mınıstr bul merzimniń aldyn ala belgilengenin jáne qosymsha jumystar qajet bolǵan jaǵdaıda ózgerýi múmkin ekenin atap ótti.
Ol jańa vagondardyń qoldanysqa engizilýi ne sebepti keshigip jatqanyn da túsindirdi.
— Bul Qazaqstanda óndirilip jatqan jyljymaly quramnyń jańa túri bolǵandyqtan, ony muqııat tekserý qajet. Synaq barysynda qaýipsizdik talaptaryna sáıkes kelmeıtin birqatar eskertý anyqtaldy. Olardyń barlyǵyn joıyp, jolaýshylar tasymalynyń qaýipsizdigin qamtamasyz etý úshin qosymsha tekserýler taǵaıyndaldy, — dedi ol.
Buǵan deıin Kólik mınıstri Nurlan Saýranbaev eldegi jol apattarynyń basty sebebin ataǵan edi.
Endi jalǵan tehbaıqaý ótkizgen ortalyqtar 3 jylǵa deıin jumys isteı almaıdy.
Júrgizýshi kýáliginen aıyrylǵan nemese jol erejesin jıi buzatyn adamdardy taksı salasyna jumysqa qabyldanbaıdy.
