Jańa sybaılas jemqorlyqqa qarsy saıasat tujyrymdamasy 2027 jyly bastalady
ASTANA. KAZINFORM – Prezıdent janyndaǵy Sybaılas jemqorlyqqa qarsy is-qımyl máseleleri jónindegi komıssııanyń otyrysy ótti. Bul týraly Aqordanyń baspasóz qyzmeti habarlady.
Qaýipsizdik Keńesi tóraǵasynyń orynbasary Aıda Balaeva Prezıdent janyndaǵy Sybaılas jemqorlyqqa qarsy is-qımyl máseleleri jónindegi komıssııanyń otyrysyn ótkizdi.
Otyrysta 2022-2026 jyldarǵa arnalǵan sybaılas jemqorlyqqa qarsy saıasat tujyrymdamasyn iske asyrýdyń aldyn ala qorytyndylary shyǵarylyp, aldaǵy bes jylǵa arnalǵan jańa strategııalyq qujat jobasy qaraldy.
Sybaılas jemqorlyqqa qarsy kúres ulttyq qaýipsizdikti qamtamasyz etýdiń mańyzdy baǵyttarynyń biri ekeni atap ótildi. Osy oraıda qabyldanyp jatqan sharalardyń nátıjeliligine basa mán berilip, strategııalyq qujattardy oryndaýda kózboıaýshylyqqa jol bermeý qajet.
Qoldanystaǵy tujyrymdamany taldaý barysynda anyqtalǵan túıtkilder men kemshilikter aldaǵy bes jylǵa arnalǵan saıasatty ázirleý kezinde eskerilýge tıis.
Jańa qujat jobasynda is-sharalardy esep úshin oryndaýdan góri sybaılas jemqorlyq táýekelderin júıeli basqarýǵa den qoıý usynyldy. Ol úshin azamattar ómirindegi naqty ózgeristerge baǵyttalǵan, nátıjesi ólshenetin maqsattar belgileý kózdelgen.
Sybaılas jemqorlyq táýekelderin taldaý men boljaýda zamanaýı tsıfrlyq sheshimder men jasandy ıntellektini qoldanýǵa erekshe nazar aýdaryldy.
Memlekettik qyzmet isteri agenttigine múddeli memlekettik organdarmen birlesip, tujyrymdama jobasy men ony iske asyrý jónindegi is-sharalar josparyn pysyqtaý tapsyryldy. Qujat Memleket basshysynyń qaraýyna engiziler aldynda Komıssııada qaıta qaralady.
Jańa tujyrymdamany iske asyrý 2027 jylǵy 1 qańtardan bastalady dep josparlanyp otyr.
Sondaı-aq otyrysta Komıssııanyń jumys formatyn jetildirý jáne kelesi jylǵa arnalǵan basym máselelerdi aıqyndaý jónindegi usynystar qaraldy.
Aıta ketelik Prezıdent Qaýipsizdik keńesi apparatyna jańa mindetter júktegen edi.
