Jańa Shúlbi aýylynda fermer ıppodrom salyp, aýyldastaryna syılady
ÓSKEMEN. QazAqparat - ShQO-nyń Borodýlıha aýdanynda jańa ıppodrom salyndy. Onyń qurylysyn jergilikti sharýa qojalyǵynyń basshysy Aleksandr Podkorytov óz qaltasynan qarjylandyrdy, dep habarlaıdy «QazAqparat» HAA tilshisi.
Aleksandrdyń aıtýynsha, ol 15 jyldan beri at minedi, sondyqtan da jastardyń at sportyna den qoıýyn, salaýatty ómir saltyn ustanyp, báıge sııaqty ulttyq oıyndardy damytqanyn qalaıdy.
«Búgingi tańda Memleket basshysy Nursultan Nazarbaev bastamashyl bolǵan «Rýhanı jańǵyrý» baǵdarlamasynyń aıasynda kóptegen jobalar júzege asyrylýda. Jańa Shúlbi aýylyndaǵy jańa ıppodrom «Týǵan jer» arnaıy jobasynyń aıasynda salyndy», - deıdi óńirdiń aqparattyq ortalyǵyndaǵylar.
Ippodrom saltanatty túrde ashylǵan soń, onda at jarystary ótti. Olarǵa kórshi Abaı, Jarma, Kókpekti jáne Glýbokoe aýdandary men Semeı, Pavlodar, Zyrıan, Shemonaıha qalalarynan da shabandozdar qatysty.
Budan tys qazaqtyń asyq, toǵyzqumalaq, arqan tartý sııaqty ulttyq oıyndary da uıymdastyryldy. Aýyldyń aıtýly kúninde aýdandyq Mádenıet úıiniń ártisteri men etnomádenı birlestikterdiń ókilderiniń qatysýymen kontsert uıymdastyryldy. Mereke qorytyndysyna oraı, jarys jeńimpazdary men júldegerleri marapattaldy.
