Jańa «Sherlok Holms» pen «Kýngfý Panda» kınolary mýzykalarynyń avtory «Oskardan» bas tartty
ASTANA. 25 qazan. QazAqparat - Álemge tanymal kompozıtorlardyń biri, kınoǵa mýzyka jazýshy Gans Tsımmer bıyl ózin «Oskarǵa» usynýdan bas tartty, dep jazdy bnews.kz saıty.
The Hollywood Reporter-ge bergen suhbatynda ol mundaı sheshimin bylaı dep túsindirdi: «Oskar short-paraqshasyn jarııalaǵannan keıin týyndaıtyn ábigerlikten sharshadym».
«Júldege usynylǵanyńdy estigennen keıin seni tańǵy beste telefon soǵyp oıatady, sodan soń úzdiksiz suhbat berýge májbúr bolasyń, keshterdiń birin jibermeı baryp, túrli adamdarmen kezdesýge týra keledi, bir sózben aıtqanda, bıyl osynyń bárinen demalamyn dep sheshtim», - dedi ol.
2011 jyly Tsımmer jańa «Sherlok Holmsqa», kezekti «Karıb teńiziniń qaraqshylaryna», ekinshi «Kýngfý Pandaǵa» jáne «Rango» mýltfılmine mýzyka jazǵan bolatyn, dep habarlaıdy «Izvestııa».
