Jańa servısterdiń arqasynda kásip ashyp, memleketten qoldaý alý jeńildeıdi
ASTANA. KAZINFORM — QR Ulttyq ekonomıka mınıstrligi bıznes-qaýymdastyqqa eki jańa tsıfrlyq ónimdi usyndy. Ázirlemeler bıznes bastaýdy jeńildetip, memlekettik qoldaý sharalaryna qol jetkizýdi arttyrýǵa arnalǵan.
Prototıpterdiń tusaýkeseri «Atameken» UKP alańynda ótkizildi. Kezdesýdiń basty maqsaty — júıeler resmı iske qosylǵansha kásipkerlermen birge ınterfeısterdi synaqtan ótkizip, naryqtyń naqty suranysyna saı bolý úshin fýnktsıonaldylyqty jetildirý.
Birinshi tsıfrlyq ónim — kásipkerdiń Biryńǵaı jeke kabınetine biriktirilgen Mindetti talaptar tizilimi. Búgingi tańda bıznesti júrgizýge qoıylatyn talaptar kóptegen normatıvtik quqyqtyq aktilerde bar. Bul olardy is júzinde qoldanýdy qıyndatady. Jańa servıs olardy biryńǵaı tsıfrlyq júıege biriktirip, tańdalǵan qyzmet túrine qaraı, kásipkerge arnalǵan mindetti talaptardyń derbes tizbesin qalyptastyrady. Chek paraǵyn alý úshin paıdalanýshynyń qyzmet salasyn tańdap, birneshe naqtylaıtyn suraqqa jaýap berýi jetkilikti. Osydan keıin júıe ruqsat qujattaryn alý úshin memlekettik qyzmetterge tikeleı siltemeleri bar qajetti talaptardyń tizimin avtomatty túrde qalyptastyrady.
Qazir tizilimge ekonomıkanyń túrli salasyn qamtıtyn 106 myńǵa jýyq mindetti talap engizilgen. Tsıfrlyq súzgileýdi qoldaný artyq talaptardy boldyrmaı, kásipkerlerdiń naqty qyzmetine qatysty normalardy ǵana usynýǵa múmkindik beredi. Tizilim sonymen qatar bızneske ákimshilik júktemeni baǵalaýǵa múmkindik beredi. Kiriktirilgen esepteý mehanızmi árbir mindetti talapty oryndaý qansha ýaqyt pen qarjylyq shyǵyndy talap etetinin anyqtaıdy. Bul kásipkerlik qyzmetti retteýdi jetildirýdiń qosymsha quraly.
Usynylǵan ekinshi servıs Memlekettik qoldaý sharalarynyń biryńǵaı júıesi. Ol barlyq qoldanystaǵy sýbsıdııalaý, jeńildetilgen nesıeleý, kepildik berý jáne grant baǵdarlamalary týraly aqparatty biriktiredi. Kásipkerler qolaıly qoldaý quraldaryn tańdap, biryńǵaı tsıfrlyq servıs arqyly ótinish bere alady. Bıznes ókilderi bastamany qoldap, servısterdi damytý jóninde usynystar engizdi. Atap aıtqanda, zańnamadaǵy ózgerister týraly proaktıvti habarlamalardy engizý, sondaı-aq paıdalanýshylardyń yńǵaılylyǵyn arttyrý úshin jasandy ıntellekt tehnologııalaryn paıdalaný usynyldy.
— Biz bıznes qoǵamdastyqtyń talap-tilegin der kezinde bilý úshin ádeıi prototıpterge daıyndyq kezeńinde keldik. Kásipkerlerdiń zańnamadaǵy ózgeris týraly habarlamalardy engizý týraly ıdeıasy-bul keremet keıs. Kelip túsken barlyq usynys egjeı — tegjeıli taldanyp, júıelerdi ónerkásiptik paıdalanýǵa berýdiń aldyndaǵy pysyqtaý kezinde eskeriledi, — dep atap ótti ulttyq ekonomıka vıtse-mınıstri Bekbolat Moldabekov.
Buǵan deıin «Halyq býhgalteri» aktsııasy aıasynda 60 myń kásipker tegin kásibı kómek alǵanyn jazǵanbyz.
