Jańa saılaý júıesi partııalardy jaýapkershiligin arttyrýǵa yntalandyrady — sarapshy
ASTANA. KAZINFORM – Qazaqstannyń jańa Konstıtýtsııasy qabyldanǵannan keıingi alǵashqy Quryltaı saılaýy memlekettik basqarýdyń tıimdi ári jaýapty formatyna kóshý úderisin aıaqtaıdy. Mundaı pikirdi Sıan Tszıaotýn ýnıversıteti Ortalyq Azııa, Qazaqstan jáne Reseı quqyqtaryn zertteý ortalyǵynyń dırektory Sofııa Ýshýrova bildirdi, dep habarlaıdy Kazinform agenttiginiń Pekındegi menshikti tilshi.
Sarapshynyń aıtýynsha, zań shyǵarýshy organnyń jańartylǵan qurylymynda jekelegen kandıdattyń jeke ambıtsııasy emes, saıası partııalar usynatyn ıdeıalar, keshendi baǵdarlamalar men damý strategııalarynyń ádil básekesi aldyńǵy orynǵa shyǵady.
— Jańa saılaý júıesi partııalardy jaýapkershiligin arttyrýǵa jáne ekonomıka, bıznesti qoldaý, bilim berý, densaýlyq saqtaý jáne áleýmettik saıasat salalarynda júıeli sheshimder usynýǵa yntalandyrady. Bul — ár azamatqa barynsha jaqyn ári túsinikti baǵdarlamasy bar tarap jeńiske jetetin tujyrymdamalar básekesi, — dep esepteıdi ol.
Onyń sózinshe, Qazaqstanda resmı tirkelgen barlyq jeti saıası partııanyń saılaý naýqanyna qatysýy shynaıy saıası plıýralızmdi qamtamasyz etip, demokratııalyq ınstıtýttardyń is júzinde tıimdi jumys istep jatqanyn kórsetedi.
— Memleket usynǵan tsıfrlyq servıster ár azamat úshin daýys berýdiń qoljetimdiligin qamtamasyz etedi. Saılaý úderisi zamanaýı tsıfrlyq standarttarǵa beıimdelgen. Saılaýshylar tiziminen ózińizdi onlaın tekserýge, al bolatyn jerińiz ózgergen jaǵdaıda daýys berýge yńǵaıly ýchaskede ýaqytyly daýys berý úshin esepten shyǵarý kýáligin rásimdeýge bolady. Bul uıymdastyrý jumystarynyń joǵary deńgeıde júrgizilgenin jáne júıeniń saılaýshylardy barynsha keń qamtýǵa baǵyttalǵanyn kórsetedi, — dedi ol.
Sofııa Ýshýrova saılaýaldy úgit-nasıhattyń jaı ǵana rásimdik kezeń bolýdan qalyp, qoǵammen tikeleı ári syndarly dıalog júrgizetin alańǵa aınalyp kele jatqanyn atap ótti.
Onyń pikirinshe, ashyq kezdesýler, buqaralyq aqparat quraldaryndaǵy pikirtalastar jáne tsıfrlyq platformalar arqyly partııalar óz baǵdarlamalarynyń is júzindegi mańyzyn dáleldeýi tıis.
— Qazirgi saılaý úderisi jaı ǵana formaldy jańartý nemese reforma úshin jasalǵan reforma emes. Bul — Qazaqstannyń saıası júıesin tereń jańǵyrtý. Búginde el memlekettik basqarýdyń búkil modelin túbegeıli ózgertý kezeńinen ótip jatyr. Osyndaı jaǵdaıda parlament saılaýy qatardaǵy elektoraldyq oqıǵa bolýdan qalyp, bılik ınstıtýttaryn qaıta jańǵyrtýdyń negizgi kezeńine aınalyp, memlekettiń uzaq merzimdi turaqtylyǵynyń negizin qalyptastyrady, — dep qorytyndylady sarapshy.
Buǵan deıin Qazaqstannyń jańa Konstıtýtsııasy ekonomıkanyń turaqtylyǵyn arttyrýǵa, ınvestıtsııa tartýǵa jáne adamı kapıtaldy damytýǵa múmkindik beretin ashyq jaǵdaı qalyptastyratyny habarlanǵan.
