Jańa saılaý prezıdenttik reformalardy sátti júzege asyrýǵa septigin tıgizedi - R.Kım
ASTANA. QazAqparat - Jańa saılaý prezıdenttik reformalardy sátti júzege asyrýǵa septigin tıgizedi. Búgin Májilistiń jalpy otyrysynda besinshi saılanǵan Parlamentti taratý jáne jańa saılaýdy taǵaıyndaý týraly QR Prezıdentiniń atyna joldanǵan Úndeýdi talqylaý barysynda depýtat Roman Kım osylaı málimdedi.
«Qazaqstan úshin jańa syn-qaterler aldynda halyqtyń birligin nyǵaıtýdan mańyzdy másele joq. Sondyqtan da, barsha qazaqstandyqtar Elbasynyń tóńiregine toptasýy qajet. Kezekten tys Májilis saılaýy daǵdarysqa qarsy sharalardy tıimdi júzege asyrý úshin barlyq qazaqstandyq qoǵamnyń toptasýyn, birigýin qamtamasyz etedi. Biz daǵdarystyń el birligin, turaqtylyǵyn synaý úshin bolatyn synaq ekenin, sonymen birge, osy arqyly jańa múmkindikter de týatynyn umytpaýymyz kerek. Jańa saılaý prezıdenttik reformalardy sátti júzege asyrýǵa septigin tıgizedi, bul Ult jospary men daǵdarysqa qarsy sharalardy saýatty quqyqtyq qoldaý úshin asa mańyzdy», - dedi Roman kım.
Depýtattyń aıtýynsha, saılaý arqyly jahandyq daǵdarystyń jaǵymsyz áserlerine qarsy turý úshin de múmkindikti arttyrady. Sonymen qatar, bul qadam qaýipsiz keleshek úshin ulttyq birlikti qalyptastyrý turǵysynan da asa ózekti.
«Joǵary jáne jergilikti ókildik berilgen saılaýlardy biriktirý bıýdjet qarajattaryn aıtarlyqtaı únemdeıdi. Sondyqtan da, Qazaqstan halqy Assambleıasynyń depýtattyq toby Májilistiń jáne máslıhattyń kezekten tys saılaýyn ótkizý týraly bastamany qoldaıdy. Biz barlyq qoǵamdyq uıymdardy, úkimettik emes uıymdardy jáne barsha el azamattaryn osy bastamany qoldaýǵa shaǵyramyz», - dedi R. Kım.
