Jańa saıası partııanyń qurylýy: «Ádilet» sezi ótip jatyr
ASTANA. KAZINFORM — Astanada «Ádilet» saıası partııasynyń quryltaı sezi ótip jatyr. Sezge Qazaqstannyń barlyq óńirinen shamamen 1000-ǵa jýyq delegat qatysyp otyr.
Sezd aıasynda Qazaqstan Respýblıkasynyń zańnamasyna sáıkes partııa qyzmetin resmı túrde bastaý úshin qajetti sheshimder qabyldanady. Partııa óz baǵdarlamasynda «Zań men tártip» qaǵıdaty ádilettiliktiń basty negizi ekenin atap kórsetedi.
Quryltaı sezin ótkizý tártibine sáıkes, sezdiń jumys organdary saılandy. Atap aıtqanda, Esep komıssııasy, Mandat komıssııasy, Sezd hatshylyǵy jáne Redaktsııalyq komıssııa quryldy. Ár komıssııa tóraǵadan jáne keminde úsh músheden turady.
Kún tártibinde kóterilgen alǵashqy másele — «Ádilet» saıası partııasyn qurý týraly boldy. Quryltaı seziniń delegattary partııany qurýǵa biraýyzdan daýys berdi. Sondaı-aq partııanyń ataýyn bekitý máselesi de tolyq qoldaý tapty.
— Sezge qatysyp, daýys bergen delegattar sany — 931 adam. Bul jalpy delegattar sanynyń 94 paıyzyn quraıdy. Qoldanystaǵy zańnama talaptaryna sáıkes elimizdiń barlyq óńirleri, respýblıkalyq mańyzy bar qalalar jáne el astanasynan delegattar sezge qatysyp otyr, — dedi Mandat komıssııasynyń tóraǵasy Lıazzat Shyńǵysbaeva.
«Ádilet» partııasynyń quryltaı seziniń delegattary uıymnyń jarǵysy men baǵdarlamasyn da bekitti. Daýys berý nátıjesine sáıkes qarsy jáne qalys qalǵandar tirkelgen joq.
Partııa sezge zańda belgilengen 5000 múshelik mejeden asyp, 9312 múshemen kelgen. Sondaı-aq ár oblys pen respýblıkalyq mańyzy bar qaladan keminde 200 músheden tirkelý talaby da tolyq oryndalǵan.
«Ádilet» partııasynyń negizgi qundylyqtary retinde ádildik, otanshyldyq, jaýapkershilik, eńbekqorlyq jáne damý aıqyndaldy. Partııa óz baǵdarlamasynda zań álsizge qatal, al kúshtige yńǵaıly bolmaýǵa tıis ekenin erekshe atap ótedi.
Eske sala keteıik, 15 sáýirde bastamashyl top jańa partııa qurý týraly resmı málimdeme jasaǵan bolatyn. Al 16 sáýirde QR Ádilet mınıstrligi tıisti habarlamanyń qabyldanǵanyn rastady. Osylaısha, 7 mamyrdaǵy quryltaı sezi uıymdy qurý jolyndaǵy negizgi kezeńderdiń biri boldy.
