Jańa Salyq kodeksiniń jobasy qashan daıyn bolady

ASTANA. QazAqparat – Jańa Salyq kodeksiniń jobasyn jan-jaqty pysyqtap, sapaly daıyndaý úshin 1,5 jyl ýaqyt kerek. Bul týraly QR Ulttyq ekonomıka mınıstri Álibek Qýantyrov aıtty, dep habarlaıdy QazAqparat tilshisi.

Búgin Senattyń jalpy otyrysynda palata tóraǵasy jańa Salyq kodeksiniń jobasy Parlamentke qashan engiziletinin surady.

«Ulttyq jospar boıynsha kelesi jyldyń qyrkúıegi belgilenip otyr. Alaıda talqylaý barysynda otandyq ári shetel sarapshylary bul baǵytta kóbirek ýaqyt kerek ekenin aıtyp jatyr. Qujatty sapaly daıyndaý úshin kem degende bir jarym jyl kerek. Biz belgilengen merzimde oryndaý úshin tıisti jumystardy atqaramyz. Aldaǵy jarty jyldyń ishinde belsendi is-sharalardy júzege asyrmaqpyz. Sondyqtan bul baǵytta depýtattardyń da qoldaýy kerek. Júktelgen tapsyrma boıynsha jańa Salyq kodeksi 2024 jyldan bastap kúshine enýi tıis», - dedi Álibek Qýantyrov.

Bul turǵyda Senat tóraǵasy M. Áshimbaev atalǵan qujat jan-jaqty pysyqtalýy kerek ekenin aıtty.

«Asyǵys qabyldanatyn zań bolmaýy kerek. Qujat Parlamentke engizilgenge deıin senatorlardy da jumyldyryp, jumys tobyna kirgizip, jan-jaqty qarastyrý mańyzdy» - dedi Senat spıkeri.