Jańa Salyq kodeksinde ıdeologııa ózgeredi - Rýslan Dálenov
«Jobany ázirleýde «Atameken» palatasy men basqa da bıznes ókilderi qatysty. Bıznestiń barlyq negizdelgen usynystary Kodeks jobasynda eskerildi. Jalpy, Kodeks jobasynda ıdeologııany ózgertý, yntalandyrýdy engizý men ákimshilendirýdi jeńildetý kózdeldi. Ideologııa adal salyq tóleýshilerdi qorǵaýǵa baǵyttalatyn bolady. Ekonomıkanyń ártúrli salalary yntalandyrýmen qamtylyp, ákimshilendirý jeńildetiledi jáne salyqty óz betinshe tóleýge yntalandyrady»,-dedi tanystyrylym barysynda QR Ulttyq ekonomıka birinshi vıtse-mınıstri Rýslan Dálenov.
Onyń sózine qaraǵanda, barlyq túsiniksiz tustary men qateler salyq tóleýshiniń paıdasyna sheshiledi. Mundaı qaǵıdat salyqtyq daýlardy ádil qaraýǵa múmkindik beredi. Eger de salyq tóleýshi salyq organynyń túsindirýine sáıkes áreket etken bolsa jáne onyń saldarynan ustanym ózgerse, onda aıppuldar men ósimpuldar salyq tóleýshige salynbaıdy.
«Keı kezderde salyq tóleýshi zańnama talaptaryn túsindirip berý týraly tısti organǵa baryp júginip, aıtqan keńester boıynsha áreket etedi. 2-3 jyl ótkennen keıin salyqtyq tekserý kelip, buryndary jasalǵan túsindirýler durys bolmaǵanyn alǵa tartyp, salyq tóleýshige aıppuldar men ósimpuldardy ústemelep eseptep beredi. Osyǵan baılanysty bundaı jaǵdaıda atalǵan sanktsııalardy qoldanbaýdy usynamyz»,-dep túsindirdi birinshi vıtse-mınıstr.
Sonymen qatar ol bızneske zańnamadaǵy ózgeristerdi zerdeleýge kóbirek ýaqyt beriletinin jetkizdi. Osy oraıda túzetýlerdi 1 shildeden keshiktirmeı qabyldaý usynylady.
«Jyl boıy kóptegen túzetýlerden qorǵaýǵa baǵyttalǵan shara engizilmek. Atap aıtqanda, barlyq týyndaǵan túzetýlerdi shoǵyrlandyra otyryp bir zań jobasymen engizý usynylyp otyr. Bul bıznestiń salyq kodeksindegi barlyq ózgeristerden habarlar bolýyna múmkindik berdi»,-dedi Dálenov.
Osy Kodeks jobasyndaǵy artyqshylyqtarǵa toqtalǵan ol, bul jobany bıznes ókilderi bıznes úshin jazǵanyn, sondyqtan saladaǵy kóptegen kedergiler joıylatynyn qadap aıtty.
