Jańa salynǵan ǵımaratqa beriletin kepildik 2 jyldan 10 jylǵa uzartylýy múmkin

ASTANA. KAZINFORM – Ónerkásip jáne qurylys mınıstri Ersaıyn Naǵaspaev jańa salynǵan ǵımaratqa beriletin kepildik 2 jyldan 10 jylǵa uzartý usynysyn qoldaıtynyn málim etti.

Májilis depýtaty Marhabat Jaıymbetov Qurylys kodeksiniń jobasyna osyndaı túzetý engizýdi usynǵan.

- Qoldanystaǵy Azamattyq kodekste qurylys bitkennen keıin nysandy paıdalaný merzimi 10 jyl dep belgilengen. Al salalyq qurylys zańnamasynda 2 jyldan kem bolmaý kerek delingen. Qurylys kompanııalary osyny paıdalanyp, eki jyldyq kelisimshartqa otyrady. Al eki jyldyń ishinde ǵımarattyń syrty bútin, ishi túzý kóringenimen, ýaqyt óte kele aqaýlar paıda bolyp, avarııalyq jaǵdaıǵa jetip jatyr. Úsh jyldan keıin qulap jatqan mektepter, qasbetterdiń qulap, sál jel tursa shatyrlardyń ushyp jatqanyn kórip júrmiz. Sondyqtan eki jyldyq kepildik – jumys istep ketsek boldy degen túsiniktiń týyndysy. Onyń saldary - sýyq aýrýhanalar, tóbesinen jańbyr tamshylaǵan mektepter.

Kodeks jobasynda sizder 5 jyl dep otyrsyzdar. Bul da jetkiliksiz. Biz bir top depýtat usynys jasaǵanbyz. Іrgetasqa, qasbetke, shatyrǵa, tirek qabyrǵalaryna kepildik 10 jyl bolý kerek. Basqa elementterge 5 jyl bola bersin. Osy usynysqa sizdiń ustanymyńyzdy bilgim keledi, - dedi depýtat.

Mınıstr Ersaıyn Naǵaspaev depýtattyń ýáji oryndy ekenin atap ótti.

- Shynymen de qazirgi eki jyldyq kepildik qurylysta defekt shyqqan kezde qıyndyqtar týyndatady. Sondyqtan biz qurylys kompanııalarynyń jaýapkershiligin kúsheıtý úshin kepildik merzimin keminde 5 jylǵa deıin uzartýdy usynyp otyrmyz. Al siz ataǵan elementterge 10 jyldyq kepildik engizý máselesin pysyqtap jatyrmyz. Jalpy biz bul bastamany qoldaımyz, - dedi vedomstvo basshysy.

Aıta keteıik, dál qazir Májilis qurylys qyzmetin qaǵazbastylyqtan aryltatyn qujatty qarap jatyr.