Jańa salyq saıasaty kásipkerlerdi qanap jatyr ma
ASTANA. KAZINFORM – Astanada jańa Salyq kodeksine talqylaýǵa arnalǵan dóńgelek ústel ótti. Іs-sharany QR Ulttyq ekonomıka mınıstrligi men «Atameken» UKP birlesip, Qazaqstan qurylysshylar odaǵy uıymdastyrdy. Talqylaý barysynda kásipkerler jańa kodekstiń keıbir normasyna qatysty alańdaýshylyq bildirdi.
Olar bıznes úshin salyq saıasatyn qatań bolyp bara jatqanyn jasyrmady. Qazaqstan qurylysshylar odaǵynyń basshysy Talǵat Erǵalıev salyq kodeksiniń kúrdeliligine baılanysty bıznestiń bir bóligi kóleńkede qalýy múmkin ekenin jetkizdi. «BK Audit» kompanııasynyń dırektory Aıjan Balakeshova jańa salyq kodeksinde sybaılas jemqorlyq táýekelderi bolýy múmkin degen alańdaýshylyq bildirdi. Kásipkerlerdiń táýelsiz birlestiginiń tóraǵasy Qanat Eleýsizov salyq zańnamasy memlekettik retteý salasyna kirmeıtinin aıtty.
«Salyq kodeksinde tekserý, aıyppuldar sııaqty quraldar bar. Munyń bári memlekettik retteýge qatysty. Biz bul kodekstiń zańǵa táýeldi aktilerge aınalý qaýpin kórip otyrmyz. Buıryq eshkimniń kelisiminsiz shyǵaryldy. Salyq kodeksi bıznesti joıady dep aıtýǵa ábden bolady», - dedi ol.
Ulttyq ekonomıka mınıstrliginiń ókili Erlan Saǵnaev jańa salyq kodeksi boıynsha jumys toby barlyq usynystardy talqylap jatqanyn, ótinishter jerde qalmaıtynyn aıtty.
«Bizge myńnan astam usynys tústi. Sarapshylar bıznes máselelerin talqylaýǵa qatysty. Kodeks jobasyn ázirleýmen qatar biz halyqaralyq sarapshylarmen tásilder týrasynda kóp keńestik. Dúnıejúzilik bank te, Halyqaralyq valıýta qory da biraýyzdan bizge bylaı deıdi: «Áriptester, arnaýly salyq rejımi – bul salyqtyq mindettemelerdi ońaılatylǵan oryndaýdyń bir túri ǵana jáne salyqtyq mindettemelerdi oryndaýdy qysqartý degen sóz emes», - dedi Saǵnaev.
Mınıstrlik ókili memlekettiń mańyzy bar orasan isterdi joqqa shyǵarmaýǵa shaqyrdy. Salyq kodeksiniń barlyq jobasy bıznestiń de, halyqtyń da talap-tilekterine saı ekenin atap ótti.
