Jańa Salyq kodeksiniń jobasyn áli de talqylaý kerek – Aıdos Sarym

ASTANA. KAZINFORM – Májilis depýtaty Aıdos Sarym Joldaý aıasynda jańa Salyq kodeksin qabyldaý merzimin kelesi jylǵa aýystyrý usynysyna pikir bildirdi.

«Ókinishke qaraı, Úkimettiń ózi atalǵan qujat jobasyn Parlamentke jaqynda ǵana engizdi. Bul qujatta mańyzdy baptar qamtylǵan. Ár saladaǵy tarıf jáne basqa da tólemderge qatysty baǵyttar eskerilgen. Eger asyǵystyq jasap qabyldap jibersek, taıaý arada taǵy ózgeris engizýge májbúr bolamyz. Sondyqtan Prezıdent Parlamentte de, Úkimette de tıisti pikir almasý jasap, sarapshylarmen jáne kásipodaqtarmen keńinen talqylaý kerek ekenin tapsyrdy. Osy satylardan ótip, qabyldaý kerek», - dedi A. Sarym Kazinform tilshisine bergen suhbatynda.

Bul turǵyda depýtat jańa Salyq kodeksi ekonomıka úshin birinshi qujat sanalatynyn atap ótti.

«Bul qujat sapaly daıyndalsa, bıýdjettiń tolyǵýy, tabystyń kelýi ońtaıly bolady», - dedi ol.

Aıdos Sarymnyń sózine qaraǵanda, búgingi Joldaýda barlyq salaǵa qatysty naqty qadamdar eskerilgen.

Budan buryn habarlanǵandaı, Qazaqstan halqyna Joldaýyn jarııalaý kezinde Memleket basshysy Qasym-Jomart Toqaev jańa Salyq kodeksin qabyldaý merzimin kelesi jylǵa aýystyrýǵa bolatynyn aıtty.

Bıyl maýsym aıynnyń aıaǵynda Qazaqstan Ulttyq ekonomıka mınıstrligi «Ashyq NQA» portalynda jańa Salyq kodeksiniń jobasy ornalastyrylǵanyn habarlady.