Jańa Salyq kodeksiniń jobasyna túzetýler paketi ázirlendi
ASTANA.KAZINFORM - Úkimette jańa Salyq kodeksin engizý jobalyq keńsesiniń 21-shi otyrysynda qujat jobasyna kezekti túzetýler toptamasy jasaldy. Jańa toptama Jobalyq keńse men salalyq jumys toptarynyń jumysy barysynda berilgen usynystardy, sondaı-aq Memleket basshysynyń tapsyrmalaryn, Úkimet qaýlylary, Premer-mınıstrdiń tapsyrmalary jáne Jobalyq keńseniń sheshimderin oryndaý úshin ázirlengen túzetýlerdi biriktirgen. Bul týraly Úkimettiń baspasóz qyzmeti habarlady.
Búgingi tańda paketke barlyǵy 45 ózgeris engizildi. Olardyń negizgi erejeleri 2 shildede Ulttyq ekonomıka mınıstrliginiń saıtynda jáne «Ashyq NQA» portalynda jarııalanǵan retteýshi saıasattyń konsýltatıvtik qujatyna engizildi.
Premer- mınıstrdiń orynbasary – Ulttyq ekonomıka mınıstri Serik Jumanǵarınniń tóraǵalyǵymen ótkizilgen Jobalyq keńseniń 21-shi otyrysynda qatysýshylar kezekti túzetýler tobyn qarady. Atap aıtqanda, tsıfrlyq aktıvterdiń zańdy aınalymyn yntalandyrý úshin jeńildetilgen salyqtyq jaǵdaı jasaý usynylady. Ol úshin jeke tulǵalardy 2026 jylǵy 1 qańtardan bastap, 2028 jylǵy 31 jeltoqsanǵa deıingi kezeńdegi tsıfrlyq aktıvter qyzmeti qazaqstandyq provaıderleri arqyly jasalǵan tsıfrlyq aktıv operatsııalarynan túsken kiris boıynsha jeke tabys salyǵynan bosatý kózdelgen.
Túzetýlerdiń jekelegen blogi ınvestıtsııalyq jobalardy memlekettik qoldaý tetikterin jetildirýge jáne sheteldik ınvestorlar úshin neǵurlym tartymdy jaǵdaı jasaýǵa arnalǵan. Atap aıtqanda, ınvestıtsııalyq basym kelisimsharttar, sondaı-aq fıskaldyq preferentsııalar paketinde kózdelgen barlyq ınvestıtsııa týraly kelisimder jasaý tetigin qalpyna keltirý usynylady. Sonymen qatar ınvestorlarǵa qajetti ınfraqurylymdy derbes júrgizýge múmkindik berý, keıinnen KTS boıynsha shegerim tetigi arqyly keltirilgen shyǵyndy óteý usynylady.
Jańa paketke buryn Jobalyq keńse otyrystarynda ázirlengen sheshimder de engizilgen. Olardyń qatarynda taýardy tańbalaý shyǵysyna ústeme shegerim engizý, múgedektigi bar adamdar úshin JTS boıynsha shegerimdi keńeıtý, áleýmettik salyqtan jekelegen kiristerdi bosatýdy qalpyna keltirý, QQS-dan faktorıng pen forfeıtıngini bosatý, esepke jatqyzylatyn aýyl sharýashylyǵy ónimi boıynsha QQS-ny túzetý, jemis sharabyna aktsız jáne basqa da bastamalar bar. Paketke Jobalyq keńse jumysy barysynda qabyldanǵan 20 sheshim kirdi.
Sondaı-aq paket salyqtyq ákimshilendirýdi odan ári tsıfrlandyrýǵa, salyq rásimderin jetildirýge jáne Salyq kodeksin qoldaný barysynda anyqtalǵan máselelerdi sheshýge arnalǵan túzetýlermen tolyqtyryldy. Olar salyq tóleýshilerdiń ótinishterin, memlekettik organdardyń, «Atameken» ulttyq kásipkerler palatasynyń jáne Joǵary aýdıtorlyq palatanyń usynystaryn eskere otyryp daıyndaldy.
Bul rette birqatar bastama zań jobasy Quryltaıdyń qaraýyna engizilgenge deıin bıznes-qoǵamdastyqpen pysyqtaýdy da talap etedi. Olardy talqylaý Jobalyq keńse alańynda jalǵasady.
Aıta keteıik, bazalyq salyq shegerimi endi kelesi aıǵa aýystyrylmaıdy.
