Jańa Salyq kodeksindegi qaıshylyqtardy joıý qajet — Prezıdent
ASTANA. KAZINFORM — Qazaqstan halqyna Joldaýyn jarııalaý kezinde Prezıdent Qasym-Jomart Toqaev salyq salasyndaǵy kemshilikterge toqtalyp, olardy joıý jóninde tapsyrmalar berdi.
Onyń sózinshe, taǵy bir basymdyq — salyq saıasatyn jetildirý.
— Jańa Salyq kodeksi búkil júıeni keshendi túrde qaıta jańǵyrtýǵa negiz qalady. Alaıda mundaı aýqymdy reforma ony ázirleý kezeńinde aldyn ala boljaý qıyn máselelerdi sózsiz anyqtaıdy. Sonyń saldarynan bıznes jekelegen normalardy qoldaný kezinde qıyndyqtarǵa tap bolyp otyr. Salyq kodeksi — bul ózgermeıtin qaǵıda da, qasıetti kitap ta emes. Ol ómir shyndyǵynan alshaq bolmaýy kerek. Sondyqtan qaıshylyqtardy joıyp, normalardyń ekiushty túsindirilýine jol bermeý, teńgerimsizdikter men kásipkerlerge túsetin artyq júktemeni azaıtý qajet, — dedi Memleket basshysy.
Sonymen qatar, salyq júıesi bıznestiń damý yntasyn joımaýǵa, ınvestıtsııa tartýǵa jáne jumys oryndaryn ashýǵa kedergi keltirmeýge tıis. Sondyqtan Úkimet bıznes ókilderiniń pikirine qulaq asyp, salyq zańnamasyna nysanaly ózgerister engizý jónindegi usynystar paketin ázirleýi qajet.
— Muny jan-jaqty saralap, óte muqııat jasaý kerek. Kásipkerlerdiń jumys isteý qaǵıdalaryn qaıta-qaıta ózgerte berýge bolmaıdy. Zańnamamyzdyń tym kúrdeli ári túsinýge aýyr bolǵany sonshalyq, ol kásipkerler úshin naǵyz bas aýrýyna aınaldy, — dedi Prezıdent.
Aıta keteıik, buǵan deıin Toqaev aýqymdy qurylys jobalaryn muqııat iriktep, qatań baqylaý qajettigin málimdegen edi.
