Jańa Salyq kodeksinde kólik salyǵyn janarmaı baǵasyna qosý eskerilmegen - depýtat

ASTANA. KAZINFORM – Kólik salyǵyn benzınge arnalǵan aktsızge aýystyrý týraly norma qarastyrylyp otyrǵan joq. Bul týraly Májilis depýtaty Berik Beısenǵalıev málim etti.

Búgin Májilistiń jalpy otyrysynan keıin tilshiler «jańa Salyq kodeksiniń jobasynda avtokólik salyǵynan bosatyp, ony janarmaı baǵasyna qosý múmkindigi qarastyrylyp jatyr ma?» degen suraq qoıdy.

Óz kezeginde B.Beısenǵalıev mundaı tájirıbe álemniń birqatar elinde bar ekenin eske saldy. Kólik salyǵyn benzınge arnalǵan aktsızge aýystyrǵan jaǵdaıda janarmaı baǵasy qymbattaıdy.

- Kólik salyǵynan bosatyp, ony janarmaı qunyna qosyp jatqan memleketter bar. Biraq onyń úlken kemshiligi bar. Bul salyq janarmaıǵa qosylsa, tabysy tómen turǵyndarǵa aýyr bolýy múmkin. Óıtkeni qozǵaltqysh kólemi úlken avtokólikti tizgindegen adamdar men kóligi shaǵyn júrgizýshiler birdeı somada bınzın satyp alady. Máselen, qazir taksıde júrip, otbasyn asyrap júrgender úshin qıyn bolady, - dedi depýtat.

Onyń aıtýynsha, buǵan deıin osy baǵytta tıisti esepteýler jasalǵan.

- Myńdaǵan taksıster kólik salyǵyna qaraǵanda, janarmaıǵa qosylǵan salyqtan edáýir utylady. Sondyqtan qazir bul usynys bizge jaramaıdy. Jańa Salyq kodeksiniń jobasynda mundaı normany qarastyryp otyrǵan joqpyz, - dedi Berik Beısenǵalıev.

Buǵan deıin elimizde benzın men dızel baǵasyn memleket rettemeýi múmkin ekenin jazǵan edik.

Jaqynda Energetıka mınıstri Almasadam Sátqalıev benzın baǵysynyń ósýine qatysty túsinik berdi.