Jańa Salyq kodeksi: Josparly salyqtyq tekserýler alynyp tastalmaq
ASTANA. KAZINFORM — Jańa salyq kodeksi 2025 jyldyń shildesine deıin qabyldanbaq. Bul týraly Úkimet otyrysynda Premer-Mınıstrdiń orynbasary – Ulttyq ekonomıka mınıstri Nurlan Baıbazarov aıtty.
«Memleket basshysy fıskaldyq saıasat boıynsha, onyń ishinde Salyq kodeksiniń jobasy aıasynda birqatar mindetter qoıdy, olardy sheshý qajet. Salyq kodeksiniń jobasynda bereshek mólsherine qaraı májbúrlep óndirip alý sharalaryn qoldaný usynylady. Sonymen qatar, josparly salyqtyq tekserýler alynyp tastalady. Shamamen 5,0 mln teńge mólsherinde bereshek bolǵan kezde keıinge qaldyrý/bólip-bólip tóleý kózdelgen. Salyqtyq jeńildikterdiń tıimdiligin arttyrý úshin jobada tıimsiz salyqtyq jeńildikterdiń bir bóligi alynyp tastaldy. Barlyq berilgen jeńildikterdi salyqtyq eseptilikte kórsetý kózdeletin bolady. Qaıta bólinýdiń joǵary deńgeıindegi ónimderi eksporttaýshylar úshin korporatıvtik tabys salyǵynyń 10 paıyz tómendetilgen mólsherlemesi kózdelgen. Budan basqa, avtomobıl ótkizý pýnktteri boıynsha osy jyldyń sońyna deıin - 5, qalǵan 4 pýnkt kelesi jyly paıdalanýǵa beriledi», - dedi mınıstr.
Onyń atap ótýinshe, Memleket basshysynyń fıskaldyq saıasat jónindegi tapsyrmalaryn iske asyrý úshin qosymsha mynadaı máseleler pysyqtalatyn bolady:
- jeke tabys salyǵynyń saralanǵan mólsherlemesin belgileý;
- bank sektory aktsıonerleriniń dıvıdendterine ádil qosymsha salyq salý;
- salyq jeńildikteriniń tıimdiligin arttyrý;
- kásipkerler úshin qolaıly jaǵdaılardy nasharlatpaı salyq rejımderin ońtaılandyrý;
- salyqtyq ákimshilendirýdi tolyq tsıfrlandyrý, onyń jazalaý tásilinen bas tartý;
- tsıfrlyq teńgeni paıdalana otyryp, qosymsha qun salyǵyn ákimshilendirý tetigin engizý.
«Jańa Salyq kodeksin 2026 jylǵy 1 qańtardan bastap qoldanysqa engize otyryp, 2025 jylǵy shildege deıin qabyldaý usynylady. Bul belsendi buqaralyq-túsindirý jumystaryn júrgizýge, zańǵa táýeldi aktilerdi ázirleýge jáne Memlekettik kirister komıtetiniń aqparattyq júıelerin daıyndaýǵa múmkindik beredi», - dedi Nurlan Baıbazarov.
