Jańa Salyq kodeksi turǵyn úı baǵasyna áser etpeıdi – Vıtse-mınıstr

ASTANA. KAZINFORM – Qarjy vıtse-mınıstri Erjan Birjanov Úkimettegi brıfıngte jańa Salyq kodeksiniń baspana baǵasyna yqpaly týraly tilshiler suraǵyna jaýap berdi.

Onyń aıtýynsha, bul ereje jańa salynatyn úıler boıynsha ǵana engiziledi.

– Qurylysy 2024 jyly bastalǵan úılerge QQS salynbaıdy. Qosylǵan qun salyǵy tek qana 2026 jyldan bastalatyn úıler boıynsha ǵana salynady. Ekinshiden, qurylys salasy boıynsha barlyq tólemge 16% QQS salynbaıdy. Sebebi qurylysshylardyń satyp alatyn materıaldary bar, olardyń ishinde QQS mólsherlemesi bar. Sol aıyrmashylyq qana tólenedi, – dedi E.Birjanov.

Sonymen birge, vıtse-mınıstr salyq mólsherlemesi turǵyn úı baǵasyna áser etpeıtinin aıtty.

– Turǵyn úı baǵasyn naryqtyń ózi retteıdi. Eger Astanada suranys kóp bolsa, úı baǵasy avtomatty túrde ósip otyrady. Onyń salyǵy bar ma, joq pa, oǵan qaramaıdy. Bul jerde básekelestik qaǵıdasy jumys isteýi kerek dep oılaımyn, – dedi E.Birjanov.

Buǵan deıin E.Birjanov Qazaqstanda 45 myń azamattyń 180 mlrd teńge qaryzy keshirilip, bankrottyq jarııalanǵanyn aıtqan edi.