Jańa Salyq kodeksi: tabys, kólik jáne múlik salyǵyna qandaı ózgeris engiziledi

ASTANA. KAZINFORM — Salyq salasynyń sarapshysy Oljas Otar jańa salyq kodeksindegi normalardy egjeı-tegjeıli tarqatty.

— Jańa norma jalpyǵa birdeı salyq rejımin qoldanbaıtyn jeke tulǵalarǵa qatysty bolady. 2026 jyly jyldyq tabysy 8500 aılyq eseptik kórsetkishten (shamamen 36 mln teńge) asatyn azamattar joǵary mólsherleme boıynsha salyq tóleıdi. Sondaı-aq birneshe jerde jumys isteıtin nemese shetelden tabys tabatyn azamattar tabysynyń jyldyq jıyntyq kólemin esepteýi tıis. Salyq esepteý kezinde jeke tulǵanyń taza tabysy emes, salyq jeńildikteri shegerilgen tabys mólsheri eskeriletin bolady, — dedi maman Jibek Joly telearnasynyń «Búgin LIVE» baǵdarlamasynda.

Sarapshy kólik salyǵyna qatysty sharttarmen bólisti.

— 20 jyldan asqan kólikterge salyq 50%-ǵa, al 10 jyldan asqandarǵa 30%-ǵa azaıady. Mysaly, 400 myń teńge salyq tóleıtin júrgizýshiniń kóligi 20 jyldan assa, 200 myń tóleıtin bolady. Sonymen qatar 2014 jyldan keıin kelgen kólikterdiń salyǵy teńestiriledi. Buryn bul kólikterdiń salyǵy joǵary edi, — dedi Oljas Otar.

Spıker jyljymaıtyn múlikti satýdan alynatyn jańartýlardy da aıtty.

— Keler jyly satyp alynǵan jyljymaıtyn múlikti 2 jyl ishinde qaıta satsańyz, 10% salyq tóleýge týra keledi. 2026 jyldan keıin satyp alynǵan páter nemese úı kem degende eki jyl ustaǵannan keıin ǵana salyq tóleýden bosatylady. Eger múlik 2025 jyldyń sońyna deıin satyp alynǵan bolsa, burynǵy bir jyldyq merzim saqtalady, — dedi sarapshy.

Eske salaıyq, Jańa Salyq kodeksi 2026 jylǵy bıýdjet kirisin 3,6 trln teńgege ulǵaıtpaq.