Jańa Salyq kodeksi páter baǵasyn qymbattatýy múmkin be

ASTANA. KAZINFORM — Premer-mınıstr Oljas Bektenov Úkimette ótken baspasóz máslıhatynda turǵyn úı naryǵyndaǵy baǵa ózgeristeri týraly tilshiler suraǵyna jaýap berdi.

− Turǵyn úı naryǵynda kúrdeli másele bolady dep kútpeımin. Bul naryq, munda bári suranys pen usynysqa baılanysty. Eger usynys bolmasa, ıaǵnı biz turǵyn úı salmasaq, onda baǵanyń ósýi anyq bolar edi. Biraq biz qurylysty toqtatpadyq, byltyr shamamen 18,9 mıllıon sharshy metr turǵyn úı salyndy, bul buryn-sońdy bolmaǵan kórsetkish. Bıyl 19 mıllıon sharshy metrden astam turǵyn úıdi paıdalanýǵa beremiz. Bul da óte qarqyndy ósim, − dep atap ótti Úkimet basshysy.

Sonymen birge, qurylys salasyndaǵy salyqqa qatysty ózgerister áserin jumsartatyn birqatar jeńildikter qarastyrylǵan.

− Munyń bári taldaý negizinde jasalyp otyr. Biz qurylys kompanııalarynyń baǵa qalyptastyrý kezinde qosylǵan qun salyǵynan bosatylatyny, túrli jeńildikterdi paıdalanatyny esepke alynbaı, artyq paıda taýyp otyrǵanyn kórdik. Sondyqtan kelesi jyly Salyq kodeksiniń normalary engizilgen soń turǵyn úı baǵasy kúrt qymbattaıdy dep oılamaımyz. Baǵanyń alypsatarlyq jolmen sharyqtaýyna nemese naryqtaǵy kelisilgen áreketter saldarynan qymbattaýyna da jol bermeımiz. Ondaı jaǵdaılar oryn alsa, bizde zań aıasynda tıisti shara qoldanýǵa tolyq múmkindik bar, − deıdi O. Bektenov.

Buǵan deıin Oljas Bektenov jyl basyndaǵy iri kásipkerlerge jasaǵan úndeýinen soń bıýdjetke 47 mlrd teńge salyq túskenin aıtqan edi. Іri qurylys kompanııalary bıznesti bólshekteý shemasyn qoldanyp, jeńildetilgen salyq rejıminde jumys istep kelgen.