Jańa Salyq kodeksi Parlament qaraýyna qashan túsedi – depýtat boljamy

ASTANA. KAZINFORM – Májilis depýtaty Tatıana Saveleva jańa Salyq kodeksin ázirleý úshin alda atqarylar jumystarǵa qatysty pikir bildirdi.

«Ózińiz de biletindeı, Prezıdent Salyq kodeksiniń jobasyn qatty synǵa aldy. Onyń tujyrymdamalyq normalary ótken jyly bıznes-qoǵamdastyqpen talqylanǵan bolatyn. Endi Úkimet is júzinde kodeks jobasyn qaıtadan pysyqtap jatyr. Boljammen biz ony osy jyldyń mamyr aıynan buryn kóre almaımyz. Sondyqtan da qandaı da bir novellaǵa pikir bildirýge áli erte», - dedi depýtat agenttik tilshisine bergen suhbatynda.

Osy oraıda ol kodeks jobasynyń qansha paıyzy qaıtadan pysyqtalýy múmkin ekendigin naqty aıta almaıtyndyǵyn atap ótti.

«Naqty aıta almaımyn. Áli kórgen joqpyz jáne jańa qandaı dúnıeler bar ekendigin, neniń qaıta qaralyp, ne qalatyndyǵyn, qandaı tolyqtyrýlar bolatyndyǵyn bilmeımiz. Jalpy, bizdiń Parlamentimiz óte úlken. Onda birneshe partııa, bir mandatty depýtattar bar. Sol sebepti barlyǵy da úlken ózgeris kútedi jáne olar alýan túrli. Sol sebepti talqylaý da qyzý bolady», - dedi Tatıana Saveleva.

Úkimettiń keńeıtilgen otyrysynda Prezıdent Qasym-Jomart Toqaev jańa Salyq kodeksin ázirleý barysyna kóńili tolmaıtyndyǵyn ashyq aıtqan edi.

Prezıdenttiń paıymynsha, sarapshylar qosylǵan qun salyǵyn kóterý kóleńkeli ekonomıkanyń úlesin arttyryp, ınflıatsııanyń ósýine ákep soqtyrýy yqtımal dep oryndy pikir bildirip jatyr.

«Bul qadam elimizdiń ınvestıtsııalyq tartymdylyǵyna da keri áser etýi múmkin. Burynǵy Úkimet Ulttyq qordan bólinetin transferttiń ornyna salyqty kóterip, qazynaǵa qosymsha qarjy túsiremiz degen ýájdi alǵa tartatyn. Jańa Salyq kodeksin ázirleý barysyna Memleket basshysy retinde meniń kóńilim tolmaıdy», - degen edi Qasym-Jomart Kemeluly.