Jańa Salyq kodeksi: Qazposhtanyń jumys sharttaryn jetildirý usynyldy
ASTANA. KAZINFORM — Salyq kodeksin engizý jobalyq keńsesiniń alańynda Qazposhta qyzmetiniń sharttaryn jetildirý jaıy talqylandy, dep habarlaıdy Úkimettiń baspasóz qyzmeti.
QR Premer-mınıstriniń orynbasary — ulttyq ekonomıka mınıstri Serik Jumanǵarınniń tóraǵalyǵymen jańa Salyq kodeksin engizý jobalyq keńsesiniń kezekti otyrysy ótti. Kún tártibindegi máseleniń biri — ulttyq poshta baılanysy operatory «Qazposhta» AQ qyzmetin salyqtyq retteýdiń jekelegen aspektisi.
Kompanııa ókilderi otyrys barysynda qatysýshylardy salyq zańnamasynyń keıbir erejelerin is júzinde qoldanýdy, olardyń kásiporynnyń qarjylyq qyzmetine áseri týraly habardar etti. Sondaı-aq qoldanystaǵy retteý tetigin odan ári jetildirýge arnalǵan usynystar qaraldy.
Otyrysqa qatysýshylar Qazposhtanyń áleýmettik mańyzy bar fýnktsııalarynyń tııanaqty oryndalýy men halyqqa ámbebap poshta qyzmetin kórsetý máselesin erekshe nazarǵa aldy.
— Talqylaý túıini, «Qazposhta» AQ Qarjy mınıstrligimen birlesip, 2027 jylǵa arnalǵan respýblıkalyq bıýdjet jobasyn qalyptastyrý kezinde ámbebap poshta qyzmetin qarjylandyrýdy jetildirý isin pysyqtaýy qajet, — delingen habarlamada.
Buǵan deıin «Qazposhta» aýyldaǵy bos ǵımarattardy áleýmettik nysandarǵa berýdi pysyqtap jatqanyn jazǵan edik.
