Jańa Salyq kodeksi kásipkerlerge aýyr tımeı me? – Jumanǵarın jaýap berdi
ASTANA. KAZINFORM – QR Premer-mınıstriniń orynbasary – Ulttyq ekonomıka mınıstri Serik Jumanǵarın jańa Salyq kodeksi kásipkerlikke qalaı áser etetinin aıtyp berdi.
«Atameken» QR Ulttyq kásipkerler palatasynda ótken baspasóz máslıhatynda BAQ ókilderi Serik Jumanǵarınnen onsyz da tarıf baǵasy ósip jatqan kezeńde jańa Salyq kodeksi kásipkerlerdiń sanyn azaıtyp jibermeı me dep surady.
— Tarıftik baǵdarlama iske asyrylǵanda mundaı jaǵdaı (álemdegi geosaıası oqıǵalar – red.) bolǵan joq. Sol sebepti qazir shamaly ózgeris engizip jatyrmyz. Tarıftik reformany qazir toqyratqan joqpyz, biraq azdap tejep otyrmyz. Sonyń arqasynda qyzmet kórsetý sektoryndaǵy ınflıatsııa jarty protsentke tómendeıdi. Ony eseptep shyqtyq. Jalpy aıtqanda, árıne, bizdiń reformamyz, QQS-ty 4 protsentke kóterý óz áserin beredi. Inflıatsııaǵa 2-2,5 protsent qosylady. Biraq kóbisi (kásipkerler – red.) muny estigennen-aq baǵany kóterip jiberdi. Jańa Salyq kodeksi kelesi jyly 1 qańtardan bastap kúshine enedi, al onyń ınflıatsııaǵa áserin qazirden sezip jatyrmyz, - dedi ol.
Sodaı-aq mınıstr elimizde salyq salasyn reformalaǵanda bızneske qoldaý kórsetý máselesi de nazardan tys qalmaǵanyn aıtty.
— Kóbisi iri kásipti usaqtap, 10 shaqty kishi jáne orta kásipkerlikti qoldanyp, salyqtan qashady. Bul qoldan jasalǵan kásipkerlik. Biz bir jaǵynan reforma jasap jatsaq, ekinshi jaǵynan bızneske qoldaýdy arttyryp jatyrmyz. «Báıterek» UBH» AQ kapıtalyn 1 trln teńgege ulǵaıtyp jatyrmyz. Damý ınstıtýttaryn kóterip, bızneske qarajat berý múmkindigin arttyryp otyrmyz. Sebebi qansha bıznes ókilimen sóılessem de, olarǵa keregi — aqshany arzan paıyzben alý múmkindigi. Qarjy ári qoljetimdi, ári arzan bolýy kerek. Qazirgi ýaqytta Ulttyq banktiń mólsherlemesi 16,5 protsent. «Báıterek» UBH» AQ birikken mólsherleme boıynsha 12,6 protsentpen berip otyr. Erteń Ulttyq banktiń mólsherlemesi azaısa, bul da tómendeıdi, - dedi Serik Jumanǵarın.
Aıta keteıik, búgin Memleket basshysy jańa Salyq kodeksine qol qoıdy.