Jańa Salyq kodeksi ınflıatsııaǵa qalaı áser etedi

ASTANA. KAZINFORM – Ulttyq ekonomıka mınıstriniń birinshi orynbasary Azamat Ámrın jańa Salyq kodeksi eldegi ınflıatsııaǵa qalaı áser etetini týraly paıymyn aıtty. 

Májilistiń jalpy otyrysynan keıin BAQ ókilderiniń suraǵyna jaýap bergen vıtse-mınıstr kodeks bıyl qabyldanǵanymen kúshine kelesi jyly biraq enetinin eske saldy.

— Qosylǵan qun salyǵynyń jańa mólsherlemesi 2026 jyldyń 1 qańtarynda kúshine enetin bolǵandyqtan onyń ınflıatsııaǵa áseri de sol kúnnen bastalady. Bizdiń esepke súıensek, 2,5-3 paıyz kóleminde yqpal etedi, — dedi Azamat Ámrın.

Eske salsaq, jańa kodekste qosylǵan qun salyǵy salynatyn aınalymnyń tómengi shegi 40 mln teńge bolady dep kórsetilgen. Úkimet QQS-dan jaltarý faktilerin azaıtý úshin jeke kásipkerlikti tirkeý rásimin qatańdatpaq.

Al aqyly medıtsınalyq qyzmetterge 10% QQS salyný usynylyp otyr. Biraq Densaýlyq saqtaý mınıstrligi dári-dármek pen medıtsınalyq qyzmetke salynatyn QQS-ny 5%-ǵa deıin túsirýdi usynyp otyr. 

Sondaı-aq, jańa kodeks boıynsha aýylsharýashylyq taýar óndirýshiler QQS-tan tolyq bosatylmaıtyn boldy.

Qujatta 1,3 trln teńgeden asatyn 128 salyq jeńildigin alyp tastaý usynylǵan. Al sán-saltanat salyǵy quny 450 mln teńgeden asatyn jyljymaıtyn múlik ıelerine qoldanylmaq. Jyldyq tabysy 33,4 mln teńgeden asatyn azamattar tabysynyń 15 paıyzyn salyqqa tóleýi múmkin.

Qosylǵan qun salyǵyn salýǵa negiz bolatyn aınalymnyń eń tómengi shegi úı janyndaǵy dúkender men shashtarazdar ıelerine qoldanylmaıdy.