Jańa Salyq kodeksi: HVQ Qazaqstandaǵy salyq túsimderine baǵa berdi

ASTANA. KAZINFORM – Qazaqstanda salyqtan túsetin túsim kóbeıgenimen, Úkimet kútken deńgeıge jetken joq. Bul týraly Halyqaralyq valıýta qorynyń (HVQ) Qazaqstandaǵy mıssııasynyń basshysy Amına Laresh aıtty.

Jańa Salyq kodeksi: HVQ Qazaqstandaǵy salyq túsimderine baǵa berdi
Foto: Kazinform

Amına Lareshtiń aıtýynsha, Halyqaralyq valıýta qory Qazaqstan bıýdjetiniń kirisine qatysty boljamyn qaıta qaraǵan. Naqty qorytyndy qańtar aıynyń sońynda jarııalanatyn esepte belgili bolady.

– Bıýdjetke túsetin salyq kólemi artty. Jalpy, kórsetkishter jaman emes. Salyq túsimderi memlekettik organdar kútken deńgeıden sál tómen bolǵanymen, bizdiń boljamymyzǵa saı keledi, - dedi spıker.

Onyń sózinshe, salyq júıesine aýqymdy ózgerister engizilgen alǵashqy jyly bıýdjetke túsetin salyq kólemin birden aıtarlyqtaı arttyrý ońaı emes.

– Sonymen qatar salyq jeńildikteri kóp elde bıýdjetke túsetin salyq kólemin aıtarlyqtaı arttyrý qıyn, - dedi HVQ mıssııasynyń basshysy.

Eske salaıyq, Qazaqstanda 2026 jylǵy 1 qańtardan bastap jańa Salyq kodeksi kúshine endi.

Buǵan deıin Memleket basshysy Qasym-Jomart Toqaev Qazaqstan halqyna Joldaýynda bıznes ókilderi kótergen máselelerdi eskere otyryp, salyq zańnamasyna ózgerister ázirleýdi Úkimet pen Ulttyq bankke tapsyrǵan bolatyn.

Jospar boıynsha, salyq zańnamasyna engiziletin túzetýler paketi 2026 jyldyń sońyna deıin Quryltaıdyń qaraýyna usynylady.