Jańa Salyq kodeksi ERG, «Qazaqmys», Kazminerals sııaqty kompanııalardyń benefıtsıarlaryn ofshordan shyǵara ala ma?
2025 jyly kúshine enetin jańa Salyq kodeksi ERG, «Qazaqmys», Kazminerals sııaqty kompanııalardyń benefıtsıarlaryn ofshordan shyǵara ala ma? Ulttyq ekonomıka mınıstrligi uıymdastyrǵan BAQ ókilderimen kezdesýde osyndaı saýal qoıyldy, dep habarlaıdy Kazinform.
«ERG, «Qazaqmys», Kazminerals sııaqty túpkilikti benefıtsıary Eýropada tirkelgen kompanııalardyń benefıtsıarlaryn ofshordan shyǵarý arqyly olardan kóbirek salyq alýǵa ne kedergi? Jańa Salyq kodeksi bul máseleni qanshalyqty sheshe alady?» - dep surady jýrnalıst.
Qarjy vıtse-mınıstri Erjan Birjanov Qazaqstan zańnamasy óndiris alpaýyttarynan negizgi tabysty kóretin túpkilikti ıelerin ofshordan shyǵara almaǵanymen, olarmen baılanysy bar ofshordaǵy kásiporyndarǵa Qazaqstannan jiberetin tabysyna salyq salýdy kózdeıtinin aıtty.
«Bul baǵytta Salyq kodeksi ǵana emes, basqa da zańnamalyq aktiler qabyldanyp jatyr. Qazir Májiliste transferttik baǵa qadaǵalaý baǵytyndaǵy zańnama qarastyrylyp jatyr. Sonyń aıasynda 5 tujyrymdamalyq ózgeris engizip jatyrmyz. Sonyń ishinde Qazaqstandaǵy óndiris alpaýyttarynyń ózimen baılanysy bar ofshordaǵy kompanııalarǵa jiberetin tabystaryn «ortaq tabys» retinde tirkep, salyq óndirip alý kózdelgen. Biz transferttik baǵa belgileý tásilderin jetildiremiz.
Qaıtarylatyn kapıtal týraly zańnama qabyldandy. Sonyń aıasynda da jumystar iske asady. Salyq kodeksi boıynsha aıtsaq, halyqaralyq salyq salý bólimin basqasha qaraımyz. Qazirgi tańda Eýropa ekonomıkalyq yntymaqtastyq jáne damý uıymymen baılanys ornattyq. Transferttik baǵa belgileý boıynsha olar óz qorytyndysyn berdi. ıAǵnı siz ataǵan máseleler jańa Salyq kodeksinde de, transferttik baǵa belgileý zańnamasynda da kórinis tabady», - dedi ol.
Mınıstrdiń orynbasary atalǵan kompanııalar Qazaqstannan ózge elderge de ınvestıtsııa salyp otyrǵandyqtan, ofshordan shyǵarý protsesi ońaı bolmaıtynyn, halyqaralyq zańnamada oǵan biraz kedergiler bar ekenin aıtyp qaldy.
«Olardyń qurylymy 5-10 memleketke deıin taramdalyp jatyr. Negizinen kópdeńgeıli kompanııalar bolyp keledi. Qarjy mınıstrliginiń ofshorǵa qatysty buıryǵy qabyldanǵan. 50-den astam ofshordaǵy kompanııanyń tabysy tirkelgen aımaǵyna tabysy shyǵarylatyn bolsa, maksımaldy mólsherlememen salyq óndiremiz. Eger kompanııanyń kontragenti ofshor aımaǵyna jatpaıtyn memlekette tirkelgen bolsa, sol elmen arada qabyldanǵan konventsııalarǵa qaraımyz. Bastapqy kompanııasy basqa memlekette tirkelgen kompanııaǵa bizge tirkelý týraly talap qoıý qazirgi halyqaralyq zańnamaǵa qaıshy. Biraq biz ózimizdiń prıntsıpimiz – Qazaqstan aýmaǵynda qalyptasqan tabystan maksımaldy kólemde salyq óndirý jáne syrtqa kapıtal shyǵarýyna bóget qoıý», - dedi Erjan Birjanov.