Jańa Salyq kodeksi baspana baǵasyn 20 paıyzǵa kóteretini ras pa — Sklıardyń jaýaby

ASTANA. KAZINFORM — Premer-mınıstrdiń birinshi orynbasary Roman Sklıar Úkimet úıindegi baspasóz máslıhatynda Salyq kodeksi baspana baǵasyn 20 paıyzǵa kóteretini týraly boljamdarǵa jaýap qatty.

— Jańa Salyq kodeksi qarapaıym azamattarǵa eshqandaı áser etpeıdi. Biz bıyl 19 mln sharshy metrden astam turǵyn úı salýǵa umtylyp jatyrmyz jáne baspana baǵasyn naryq ádisterimen rettep otyrmyz. Alaıda, 10 jyl boıy memleket jeke menshik qurylys kompanııalaryna turǵyn úı tapsyrysyn berý arqyly baǵaǵa yqpal etip keledi.

Bizde turǵyn úı baǵasy ósken dep aıtýǵa kelmeıdi. Meniń aıtaıyn degenim, bıznes-klass nemese elıtaly turǵyn úı segmentiniń baǵasy emes. «Ekonom-klass» sanatyndaǵy turǵyn úı qansha turýy kerek bolsa, týra sonsha turady. Biz munda baǵanyń kúrt ózgerýin kórip otyrǵan joqpyz. Jańa Salyq kodeksin qabyldaýdyń arqasynda alpaýyt qurylys kompanııalary bıznesti bólshekteý arqyly tabysqa kenelý tájirıbesinen ketedi, — dedi ol.

Roman Sklıar Jańa Salyq kodeksi kúshine engennen keıin qurylys kompanııalaryna memlekettik tapsyryspen jumys isteý tıimdi bola túsetinin aıtty.

— Salyqty kóp tólegendikten tabysy azaıady. Degenmen «Baqytty otbasy», «Naýryz jumysker» baǵdarlamalary aıasynda az qamtylǵan azamattarǵa arnap memlekettik tapsyrys jasaǵan kezde jobalyq smetalyq qujattamaǵa sáıkes baǵa parametrlerin retteıtin bolamyz. Astyn syzyp aıtaıyn, baspana baǵasyn naryqtyq jolmen bolsa da retteımiz, — dedi Premer-mınıstrdiń birinshi orynbasary.

Aıta keteıik, keshe Roman Sklıar Airbus-tyń Eýropa boıynsha prezıdenti Joan Pelısemen avıatsııa salasyndaǵy yntymaqtastyqty damytý jaıyn talqylap, Qazaqstan aýmaǵynda azamattyq jáne memlekettik avıatsııa ushaqtaryn jóndeý men qyzmet kórsetý ortalyǵyn ashý qajettigin málimdegen bolatyn.