Jańa salyq kodeksi: BAQ-qa jeńildik berile me
ASTANA. KAZINFORM – Qosylǵan qun salyǵyn salǵanda BAQ-ty gazet-jýrnal, tele-radıo, ınternet dep bólý durys emes. Bul týraly Májilistiń jalpy otyrysynda Premer-Mınıstrdiń orynbasary – Ulttyq ekonomıka mınıstri Serik Jumanǵarın aıtty.
Jańa Salyq kodeksin talqylaý barysynda Májilis depýtaty Nartaı Aralbaıuly qujat dál osy baǵytta qabyldansa, onda elimizdegi BAQ-qa túsetin salyqtyń salmaǵy arta túsetindigine alańdaýshylyq tanytty.
- Al biz álemde aqparattyq soǵystyń qalaı júrip jatqanyn, ár el aqparattyq turǵyda óz ózin qalaı qaýipsizdendirýge tyrysyp jatqanyn jaqsy bilemiz. Sondyqtan eger QQS elimizdegi BAQ-qa 16 paıyzǵa jetse, onda bul otandyq BAQ-tyń azamattarymyzǵa qajetti jobalar jasaýǵa, qajetti dúnıelerdi joldaýyna, ıaǵnı básekege qabilettiligine keri áserin tıgizedi. Soǵan oraı sheteldik BAQ elimizde qaptaıdy. Jurtymyzǵa jaqsylyq ákele qoımaıtyn sheteldik jobalar teleekrannan da, radıodan da, ınternetten de túspeıdi degen sóz. Bul – úlken qaýip, - dedi Májilis depýtaty.
Sonymen qatar ol oblystyq, aýdandyq, qalalyq gazet-jýrnaldarynyń qyzmetkerleri mardymsyz aılyqqa áreń kúnin kórip otyrǵanyna nazar aýdartty.
- Eger olarǵa salynatyn QQS 16 paıyzǵa jetse, onda kóbisi jabylyp tynady. Aımaqtar tıisti aqparat quralynsyz, jýrnalıster jumyssyz qalady. Sondyqtan eki usynys aıtqym keledi. Birinshisi – otandyq gazet-jýrnaldarǵa QQS-ti alyp tastaý, ıaǵnı 0 paıyz qylý. Ekinshisi – elimizde resmı tirkelgen otandyq telearnalar men radıolarǵa jáne ınternet resýrstarǵa QQS-ti 10 paıyz deńgeıinde qaldyrý, - dedi Nartaı Aralbaıuly.
Saýalǵa jaýap bergen Premer-Mınıstrdiń orynbasary – Ulttyq ekonomıka mınıstri Serik Jumanǵarın BAQ-qa 16 paıyz QQS qalatyndyǵyn aıtty.
- Qazir olarǵa eshqandaı jeńildikter kózdelmegen. Árbir BAQ-tyń jyldyq taýar aınalymyna baılanysty bolady. Biz QQS-tyń shekti mánin 40 mln teńge dep qoldadyq. 40 mln-nan assa, arnaýly salyq rejımine ilikpese, onda QQS tóleıdi. Ol aqıqatty dúnıe dep sanaımyn. Sheteldik BAQ kelse, onda olar da salyq tóleıdi. Sol sebepti árbir BAQ-tyń básekege qabilettiligi onyń bergen aqparatta azamattardyń qyzyǵýshylyǵyn týdyrýyna, sapasyna baılanysty bolady. Ony durys dep esepteımin. Olardy jýrnal, gazet, ınternet, radıo dep bólý durys emes dep esepteımiz - dedi Serik Jumanǵarın.
Aıta keteıik, Premer-mınıstrdiń orynbasary – Ulttyq ekonomıka mınıstri Serik Jumanǵarın Salyq kodeksiniń jańa redaktsııasyna osyndaı norma engizýdi usyndy.