Jańa Salyq kodeksi: Agrarshylardyń tehnıka lızıngi boıynsha shyǵyny 4,6 mlrd teńgege ósti
ASTANA. KAZINFORM — Májilis depýtaty Erbol Danaǵulov Premer-mınıstrdiń orynbasary — Ulttyq ekonomıka mınıstri Serik Jumanǵarınge aýyl sharýashylyǵy tehnıkasyn lızıngke alǵan sharýalarǵa salyqtyq júktemeniń artýyna qatysty saýal joldady.
Depýtattyń aıtýynsha, aýyl sharýashylyǵynyń jaǵdaıy aýyldyń ǵana máselesi emes. Bul el ekonomıkasynyń turaqtylyǵyna, azyq-túlik qaýipsizdigine jáne eksporttyq áleýetke tikeleı áser etetin strategııalyq sala. Saladaǵy negizgi máselelerdiń biri — aýyl sharýashylyǵy tehnıkasynyń tozýy. Osyǵan baılanysty Prezıdent tehnıka parkin jyl saıyn 8-10 paıyzǵa jańartýdy tapsyrǵan.
— Aýyl sharýashylyǵy óndirisiniń tıimdiligi zamanaýı tehnıkaǵa tikeleı táýeldi. Tehnıkany jańartý — sharýalarǵa kórsetiletin jaı ǵana qarjylyq qoldaý emes. Bul ónimdilikti arttyrýdyń, ishki naryqty turaqty qamtamasyz etýdiń jáne otandyq ónimniń básekege qabilettiligin kúsheıtýdiń negizgi sharty, — dedi Erbol Danaǵulov.
Depýtat qazirgi tańda sharýalarǵa 6 paıyzdyq jeńildetilgen nesıe jáne lızıngtik baǵdarlamalar arqyly qoldaý kórsetilip otyrǵanyn atap ótti. Alaıda jańa Salyq kodeksiniń kúshine enýine baılanysty qosylǵan qun salyǵynyń mólsherlemesi 12 paıyzdan 16 paıyzǵa deıin ósýi aýyl sharýashylyǵy tehnıkasyn lızıngke alǵan sharýalardyń shyǵynyn arttyrǵan.
Onyń málimetinshe, «QazAgroQarjy» AQ arqyly tehnıka alǵan 13 181 sharýashylyq úshin salyqtyq júkteme 4,6 mlrd teńgege ulǵaıǵan.
— Negizgi qaryzyn belgilengen keste boıynsha ýaqytyly ótep otyrǵan sharýalarǵa salyq aıyrmasy boıynsha ósimpul eseptelýi olardyń qarjylyq jaǵdaıyna qosymsha salmaq túsiredi, — dedi depýtat.
Erbol Danaǵulovtyń pikirinshe, salyq reformasynyń maqsaty men agrarlyq sektordy qoldaý sharalary ózara úılesýi qajet. Memleket bir jaǵynan aýyl sharýashylyǵy tehnıkasynyń parkin jańartýǵa jeńildetilgen qarjy usynyp otyrsa, ekinshi jaǵynan salyqtyq ózgerister bul qoldaýdyń tıimdiligin tómendetpeýi tıis.
Osyǵan baılanysty depýtat Ulttyq ekonomıka mınıstrliginen «QazAgroQarjy» AQ-nyń lızıngtik sharttary boıynsha jasalǵan kelisimderdi salyq reformasynyń logıkasyna sáıkes qaıta qaraýdy, osy kezeńge qoldanylatyn ótpeli erejelerdi qarastyrýdy jáne agrarlyq sektordy salyq reformasynyń jańa kezeńine beıimdeý úshin keshendi sharalar qabyldaýdy surady.
Buǵan deıin depýtat Aısulý Súleımen pılotsyz avıatsııany damytý úshin biryńǵaı tsıfrlyq júıe qurýdy usynǵan edi.
