Jańa salyq kodeksi 2026 jyly 1 qańtarda iske qosylady dep josparlap otyrmyz - depýtat
ALMATY. KAZINFORM - Jańa salyq kodeksi 2026 jyldyń 1 qańtarynan bastap iske qosylýy múmkin. Bul týraly Májilis depýtaty Berik Beısenǵalıev Kazinform tilshisine bergen jaýabyna aıtty.
Almatyda QR Parlamenti Májilisi janyndaǵy Qoǵamdyq palatanyń kóshpeli otyrysy ótti. Jıynǵa qatysqan Májilis depýtaty ári jańa salyq kodeksi boıynsha jumys tobynyń jetekshisi Berik Beısenǵalıev zań jobasynyń mańyzdylyǵyn túsindirdi.
- Salyq kodeksi - óte mańyzdy qujat. Jańa zań jobasy bıýdjetti tolyqtyrý joly ǵana emes, qarjylaı naryqty durys retteýdiń tıimdi mehanızmderiniń biri. Eger salyq kodeksine baılanysty jıi talqyǵa túsetin suraqtarǵa kelsek, salyq tóleıtin adam árqashan “kóp tólep jatyrmyn” dep oılaıtyn bolady. Al memleket nemese memlekettik kirister komıteti árdaıym “salyq az jınaldy” degen ustanymda bolady. Sondyqtan munda osy máseleniń bárine ortaq jaýabyn taýyp, salyq elge keletin ınvestıtsııalardy kóbeıtetindeı jolyn tabýymyz qajet, - dedi ol.
Sondaı-aq depýtat salyq kodeksi qashan qabyldanyp, zań qashan iske qosylýy múmkin ekenin atap ótti.
- Zań naýryz aıynda Májilisten shyǵady dep josparlap otyrmyz. Odan keıin ol Senatta 2 aı qaralýy kerek. Sosyn Memleket basshysy 2025 jyldyń birinshi jartyjyldyǵyna qol qoıady degen jospar bar. Solaı bolatyn bolsa, salyq kodeksi 2026 jyly 1 qańtardan bastap iske qosylady, - dedi Berik Beısenǵalıev.
Eske salaıyq, Prezıdent jańa Salyq kodeksin qabyldaý merzimin kelesi jylǵa aýystyrýǵa bolatynyn aıtty.
Buǵan deıin jańa salyq kodeksinde tólemder sany 77-ge azaıyp, 6 alym túri qysqartylmaq ekenin jazǵanbyz.
Sondaı-aq jańa salyq kodeksinde josparly salyqtyq tekserýler alynyp tastalmaq.
Oǵan qosa, jańa zań jobasy boıynsha eski kólik salyǵy 50%-ǵa tómendeıdi.