Jańa Salyq kodeksi 2026 jylǵy bıýdjet kirisin 3,6 trln teńgege ulǵaıtady — Qarjy mınıstri

ASTANA. KAZINFORM — Májilistiń jalpy otyrysynda Qarjy mınıstri Mádı Takıev aldaǵy úsh jyldyq bıýdjetin tanystyryp jatyr. 

— 2026 jylǵa túsimder 23,1 trln teńge deńgeıinde boljanyp otyr. Onyń ishinde, transfertterdi eseptemegende, kiris 19,2 trln teńge.

Ekonomıkanyń ósimine, jańa Salyq kodeksiniń qabyldaýyna, onyń ishinde salyqtyq jáne kedendik ákimshilendirýge baılanysty kiris bıylmen salystyrǵanda 3,6 trln teńgege ulǵaıyp otyr. Bul, memlekettik qarjynyń turaqtylyǵyna ákeledi.

Bıýdjet shyǵysy 27,8 trln teńge, ıaǵnı osy jylmen salystyrǵanda 2 trln teńgege ulǵaıyp otyr.

2026 jyly bıýdjet tapshylyǵy jalpy ishki ónimge shaqqanda 2,5% deńgeıinde, al 2028 jylǵa qaraı ol 0,9%-ǵa deıin tómendeıdi dep boljanyp otyr. Bul bıýdjettik tártipti nyǵaıtýǵa jáne boryshtyq júktemeni azaıtýǵa alyp keledi, — dedi mınıstr.

Ol shyǵystyń negizgi baǵyttaryna, qysqasha toqtala ketti.

Aıtýynsha, 2026 jyly áleýmettik shyǵysqa 10,7 trln teńge bólý josparlanyp otyr. Onyń ishinde áleýmettik tólemderge 6,8 trln teńge, adamı kapıtalǵa 3,9 trln teńge qarastyrylǵan.

Aıta keteıik, búgin Májilis úsh jyldyq respýblıkalyq bıýdjetti talqylap jatyr. https://kaz.inform.kz/news/mazhls-ush-zhildik-respublikalik-byudzhett-talkilaydi-c0f98f/