Jańa Rım Papasy týraly ne bilemiz
ASTANA. KAZINFORM – Beısenbi kúni keshke Sıkstın kapellasynyń murjasynan aq tútin shyqty, bul papalyq konklavta kardınaldardyń Rım Papasy Frantsısktiń muragerin tańdaı alǵanyn bildirdi. Tańdaý 69 jastaǵy Robert Frensıs Prevoǵa tústi, dep habarlaıdy Kazinform menshikti tilshisi.
Onyń saılanýy eki kún ishinde tórt daýys berýden keıin ótti, bul osy konklav tarıhyndaǵy eń qysqala saılaý bolyp otyr.
Eýropa baspasózi bul kardınaldardyń Rım Papasy Frantsısk qaıtys bolǵannan keıin kóshbasshylyqty tez arada qalpyna keltirip, birligin tanytýǵa umtylýynyń belgisi dep jazdy.
Amerıkalyq kardınal Eýropadaǵy jáne álemdegi kóptegen adamdar úshin kútpegen jerden Rım-katolık shirkeýiniń 267-shi basshysy boldy. Onyń esimi aıqyn favorıtter qatarynda bolmaǵan, biraq R.Prevo esimi Vatıkan sarapshylary úshin beımálim dep aıtý qate bolar edi.
Jańa Rım Papasy Lev XIV esimin aldy.
Papanyń tańdaǵan esimi onyń bolashaq saıasatyn kórsetedi dep sanalady. Rım Papasy Lev XIII Qasıetti Taqta 1878 jyldan 1903 jylǵa deıin otyrdy jáne óziniń belsendi dıplomatııasymen este qaldy. Onyń bıligi kezinde Vatıkannyń álemniń kóptegen elderimen qarym-qatynasy jaqsardy. Osylaısha, R.Prevo syrtqy saıasatqa úlken kóńil bóledi dep kútýge bolady.
Italııanyń Ansa aqparat agenttigi jazǵandaı, kardınal Robert Frensıs Prevo — qyzyq tulǵa jáne ol Soltústik jáne Ońtústik Amerıka kardınaldary — konklav saılaýshylarynyń edáýir úlken tobynan papalyqqa úmitker bolǵan.
Robert Frensıs Prevo marqum Rım Papasy Frantsıskke jaqyn bolǵan. 2023 jyldan bastap ol epıskoptar isteri boıynsha prefekt jáne Latyn Amerıkasy boıynsha Papalyq komıssııanyń prezıdenti qyzmetin atqardy.
Ol Chıkagoda frantsýzdar, avgýstındikter otbasynda dúnıege kelgen jáne «kanondyq quqyq» mamandyǵy boıynsha joǵary bilim aldy. 1985 jyldan 1999 jylǵa deıin Perýde mıssıoner boldy.
Chıkagoǵa qaıtyp oralǵan ol 2001 jyly Áýlıe Avgýstın ordeniniń prıory boldy, jáne bul laýazymdy 2013 jylǵa deıin atqardy. Sol jyly ol Perýge Chıklaıo epıskopy retinde oraldy.
Rım Papasy Frantsısk ony 2023 jyly Rımge shaqyrdy.
Ispan, portýgal, ıtalıan jáne frantsýz tilderinde erkin sóıleıtin amerıkalyq epıskop Perýdegi margınaldy halyqtar men mıgranttarǵa erekshe kóńil bóldi, Frantsısk osyny óte joǵary baǵalady.
Epıskoptardyń prefekti retinde ol júzdegen prelat taǵaıyndap, Frantsısk tárizdi dindar, ashyq jáne ilgerishil adamdar urpaǵyn qalyptastyrdy.
Robert Frensıs Prevo ustamdy jáne salmaqty kardınal bedeline ıe boldy. 2023 jyly ol Memlekettik hatshy Petro Parolınmen birge Nemis sınodaldyq joly máselesin sheshti.
Bul nemis eparhııalaryndaǵy pikirtalas, olar tym jańashyl bola bastap, alaýyzdyq týdyrýy múmkin edi.
— Myqty kandıdattary joq latynamerıkalyq kardınaldar men progresshilder men konservatorlar bolyp ekige bólingen amerıkalyqtardyń daýysy onyń esimine toqtalǵany anyq, — dep jazdy ıtalıandyq baspasóz.
Jańa Rım Papasy eń qyzý taqyryptar boıynsha sırek sóıledi: ol óziniń ustamdylyǵymen erekshelenedi jáne eńbekke qabilettiligi men tyńdaı bilý qasıeti úshin kardınaldardyń arasynda bedelge ıe.
Sonymen qatar, shirkeýdiń jańa basshysy Frantsısk reformalaryn jalǵastyrady, biraq birshama qalypty baǵytta. Katolık shirkeýi jańa pontıfıkten osyny kútetin shyǵar.
Papanyń alǵashqy sózi beıbitshilikke arnaldy.
— Barshańyzǵa beıbitshilik tileımin! Qymbatty aǵalar men ápkeler, bul Qudaıdyń otary úshin ómirin qıǵan izgi baqtashy, qaıta tirilgen Isanyń alǵashqy sálemi. Osy beıbitshilik sálemi sizderdiń júrekterińizge enip, otbasylaryńyzǵa, barlyq adamdarǵa, qaı jerde bolsa da, barlyq ulttarǵa, búkil jer betine jetkenin qalaımyn. Beıbitshilik bolsyn! — dedi katolıktik shirkeýdiń jańa basshysy dinshilderge.
Buǵan deıin Jańa Rım Papasy Robert Prevo bolǵanyn jazǵan bolatynbyz.
Memleket basshysy Rım Papasy XIV Levke quttyqtaý jedelhatyn joldady.