Jańa reıster, Neo Nomad: elimizde týrızm salasy qalaı ózgerip jatyr

Qazaqstandyqtar qaı elderge kóbirek saıahattaı bastady

2026 jylǵy jazǵy týrıstik maýsymda qazaqstandyqtardyń saıahat tańdaýynda birqatar ózgeris baıqalyp otyr. Bıyl sheteldik baǵyttar arasynda Vetnam, Mysyr, Taıland, Túrkııa, Qytaı jáne Maldıv araldary suranysqa ıe.

Qazaqstan Respýblıkasy Týrızm jáne sport mınıstrligi Týrızm ındýstrııasy komıtetiniń málimetinshe, 2025-2026 jyly Vetnam men Mysyrǵa suranys ósken, al Qytaı vızasyz rejım men tikeleı reısterdiń arqasynda pozıtsııasyn nyǵaıtqan. Álemdegi geosaıası jaǵdaıǵa baılanysty týrısterdiń bir bóligi BAÁ-den Azııa baǵyttaryna aýysqan.

Komıtettiń baǵalaýynsha, qazaqstandyqtardyń shetelge saıahattaýyna eń aldymen týrlardyń quny men qoljetimdiligi áser etip otyr. Onyń ishinde vızasyz rejım men charterlik reısterdiń bolýy da mańyzdy ról atqarýda. Sonymen qatar jańa áýe reısteriniń ashylýy, Qytaı, Azııa jáne Eýropa baǵyttarynyń keńeıýi de týrısterdiń tańdaýyna yqpal etip jatyr.

Budan bólek, valıýta baǵamy men geosaıası jaǵdaıǵa baılanysty keıbir Taıaý Shyǵys baǵyttaryna suranys tómendegen. Jaǵajaılyq demalys pen maýsymdyq faktorlar da qazaqstandyqtardyń qaı elge baratynyn aıqyndaıtyn negizgi ólshemderdiń biri bolyp otyr.

Qazirgi tańda qazaqstandyqtardyń shetelge saıahatyn jeńildetý úshin jańa halyqaralyq áýe reısterin ashý, tikeleı reıster sanyn arttyrý jáne vızalyq rejımdi jeńildetý baǵytynda jumystar júrgizilip jatyr. Komtet bul qadamdar tanymal týrıstik baǵyttardyń qoljetimdiligin edáýir arttyratynyn atap ótti.

– Máselen, Air Astana áýekompanııasy Shanhaı, Gýanchjoý, Larnaka jáne Dalaman sııaqty jańa baǵyttardy iske qosyp, Seýl men birqatar halyqaralyq marshrýttar boıynsha ushý jıiligin arttyryp jatyr. Al FlyArystan 2026 jylǵy 3 qyrkúıekten bastap Úrgenishke, sondaı-aq 23 qyrkúıekten bastap Qytaıdyń Chýntsın qalasyna jańa halyqaralyq reısterdi bastaýdy josparlap otyr, - dedi Týrızm ındýstrııasy komıteti tóraǵasynyń orynbasary Aıdyn Qapashev.

Іshki týrızm boıynsha qaı óńirler kósh bastap tur

Sheteldik baǵyttarmen qatar qazaqstandyqtardyń el ishinde saıahattaýǵa da qyzyǵýshylyǵy saqtalyp otyr. Ulttyq statıstıka bıýrosynyń derekterine sáıkes, 2026 jyldyń birinshi toqsanynda qonaqúıler men demalys oryndarynda qyzmet kórsetken týrıster sany boıynsha Almaty qalasy kósh bastady. Bul kezeńde qalaǵa 472 930 týrıst kelgen. Ol jalpy týrıstik aǵynnyń 24,1 paıyzyn quraǵan.

Odan keıin Astana qalasy tur. Elordaǵa 352 243 týrıst kelgen, bul jalpy kórsetkishtiń 17,9 paıyzyna teń. Kóshbasshy óńirler qatarynda Aqmola oblysy (161 169 týrıst), Shymkent qalasy (139 443 týrıst) jáne Almaty oblysy (112 845 týrıst) bar.

Al tek qazaqstandyq týrısterdiń kórsetkishine nazar aýdarǵanda óńirlerdiń orny ózgeredi. 2026 jyldyń birinshi toqsanynda ishki týrıster sany boıynsha Aqmola oblysy kósh bastap, munda 159 442 týrıst demalǵan. Odan keıin Shymkent qalasy – 133 028, Almaty oblysy – 111 242, Túrkistan oblysy – 84 931 jáne Shyǵys Qazaqstan oblysy – 80 010 týrıst kórsetkishimen alǵashqy bestikke kirdi.

Sońǵy jyldary ishki týrızmniń óńirlik qurylymy da ózgerip keledi. 2022–2023 jyldary kóshbasshylar qatarynda Aqmola, Shyǵys Qazaqstan jáne Almaty oblystary bolsa, 2024 jyly Mańǵystaý oblysy týrıster sanynyń aıtarlyqtaı ósýiniń arqasynda aldyńǵy oryndarǵa shyqqan.

– Máselen, 2025 jyly Aqmola jáne Almaty oblystary kóshbasshylyq pozıtsııalaryn nyǵaıtty. Al 2026 jyldyń birinshi toqsanynda Túrkistan oblysy alǵash ret ishki týrıster eń kóp barǵan bes óńirdiń qataryna endi. Mınıstrlik muny óńirdegi týrıstik ınfraqurylymnyń damýy jáne tarıhı-mádenı týrızmge qyzyǵýshylyqtyń artýymen baılanystyrady, - dedi tóraǵasynyń orynbasary.

Jalpy elimizde demalýshylar arasynda Almaty, Astana jáne Shymkent sııaqty iri qalalar, sondaı-aq Aqmola, Almaty, Túrkistan jáne Shyǵys Qazaqstan oblystary negizgi týrıstik baǵyttar retinde suranysqa ıe. Sonymen qatar tabıǵı rekreatsııalyq aımaqtar men kýrorttyq baǵyttarǵa qyzyǵýshylyqtyń artýy óńirlik týrızmniń turaqty ósip kele jatqanyn kórsetedi.

Komıtettiń túsindirýinshe, ishki baǵyttardyń azamattar arasynda tanymal bolýy olardyń jaqyn ornalasýymen, tildik kedergilerdiń joqtyǵymen, bılet baǵasynyń qoljetimdiligimen jáne qysqa merzimdi demalysty uıymdastyrýdyń ońaılyǵymen baılanysty.

Sonymen qatar týrıstik ınfraqurylym men qyzmetterdiń ártúrliligi de ishki saıahatqa degen suranysty arttyrady. Qazaqstan óńirlerinde emdik-saýyqtyrý, ekotýrızm jáne jaǵajaı demalys baǵyttary damyp keledi. Bul saparlardy demalys kúnderindegi qysqa serýen retinde de, ártúrli sanattaǵy azamattarǵa arnalǵan tolyqqandy demalys retinde de josparlaýǵa múmkindik beredi.

Jańa áýejaılar salynyp, otbasylyq demalys qoljetimdi bola túspek

Іshki týrızmniń qoljetimdiligin arttyrý maqsatynda birneshe júıeli shara iske asyrylyp jatyr. Sonyń biri – Kids Go Free baǵdarlamasy. Baǵdarlama aıasynda otandyq týroperatorlardyń týrpaketterine kiretin 2–17 jas aralyǵyndaǵy balalardyń áýebıleti sýbsıdııalanady. Komıtet málimetinshe, bul otbasylardyń saıahat shyǵynyn edáýir azaıtýǵa múmkindik beredi.

Sonymen qatar Mańǵystaý jáne Şýche-Býrabaı kýrorttyq aımaqtaryn, sondaı-aq Almaty taý klasterin damytýdyń keshendi josparlary bekitilgen.

Kendirli, Zaısan jáne Katonqaraǵaıda jańa áýejaılar salynyp jatyr. Mınıstrlik shalǵaı óńirlerge qatynaýdy jeńildetetin bul ınfraqurylymdyq jobalardy 2026 jyly aıaqtaýdy kózdep otyr.

Іshki týrızmdi damytýda iri is-sharalardy uıymdastyrýǵa da mán berilip otyr. Ótken jyldyń sońynda el boıynsha 55 sharany qamtıtyn Oqıǵalyq kúntizbe bekitildi. 2026 jyldyń basynan beri josparlanǵan 55 is-sharanyń 25-i ótkizilgen.

Tamyzda bes iri festıval ótedi

Tamyz aıynda Astana qalasynda, sondaı-aq Atyraý, Qostanaı, Mańǵystaý jáne Almaty oblystarynda bes is-shara ótkizý josparlanǵan. Olardyń qatarynda Qostanaı oblysyndaǵy «Qostanai Dala Fest» agrofestıvali, Astanadaǵy «Comic Con Astana» gık-festıvali, Mańǵystaý oblysyndaǵy «Aq maya Fest» shubat festıvali, Atyraý oblysyndaǵy «LOTOS» ekologııalyq festıvali jáne Almaty oblysyndaǵy «Baıserke aspany» avıashoýy bar.

– Jalpy halyqaralyq aýdıtorııanyń qyzyǵýshylyǵyn týdyratyn biregeı bastamalarǵa da qoldaý kórsetip keledi. Sonyń biri – Mad Max postapokalıpsıs álemi stılindegi Drive Forum GREAT ORDA festıvali. Mınıstrlik málimetinde bul jıynǵa Qazaqstan, Reseı, Ózbekstan, Qyrǵyzstan jáne ózge de elderden 1500-den astam saıahatshy men qonaq keledi dep josparlanyp otyr, - dedi Aıdyn Qapashev.

Neo Nomad vızasyn alǵandardyń kóbi 73 eldiń azamaty aldy

Qazaqstan sheteldik týrıstermen qatar elde qashyqtan jumys istegisi keletin shetel azamattaryn da tartýǵa mán berip otyr. Osy maqsatta 2024 jyly qarashada Neo Nomad vızasy iske qosylǵan.

Bul vıza sheteldik kompanııalarǵa qashyqtan jumys isteıtin nemese sheteldik tapsyrys berýshilerge qyzmet kórsetetin jáne tabysyn sheteldik kózderden alatyn azamattarǵa arnalǵan.

2026 jylǵy maýsym aıynyń sońyndaǵy jaǵdaı boıynsha, 19 memlekettiń azamattaryna 73 Neo Nomad vızasy resimdelgen. Onyń ishinde eń kóp vızany AQSh azamattary alǵan – 27. Ulybrıtanııa azamattaryna 9, Kanada azamattaryna 8 vıza berilgen.

Sondaı-aq Neo Nomad vızasyn Aýstralııa, Frantsııa, Koreıa Respýblıkasy, Germanııa, Irlandııa, Polsha, Latvııa jáne basqa elderdiń azamattary alǵan.

– Qazirgi ýaqytta vıza alýshylardyń mamandyqtary boıynsha jeke statıstıka júrgizilmeıdi. Degenmen bul vızalyq rejım eń aldymen IT salasynyń qyzmetkerlerine, konsýltanttarǵa, dızaınerlerge, marketologtarǵa, kásipkerlerge jáne kreatıvti ındýstrııa ókilderine arnalǵan. Osylaısha, qyzmetin qashyqtan júzege asyra alatyn mamandar vızanyń múmkindikterin paıdalana alady, - dedi komıtet tóraǵasynyń orynbasary.

Baǵdarlama salystyrmaly túrde jańa bolǵanymen, statıstıka oǵan degen qyzyǵýshylyqtyń birtindep artyp kele jatqanyn kórsetedi. Máselen, 2026 jyldyń birinshi jartyjyldyǵynda 2025 jylǵy kórsetkishke teń kólemde vıza berilgen.

Qazaqstan tsıfrlyq kóshpendilerdi nesimen qyzyqtyrady

Qashyqtan jumyspen qamtý jáne ıkemdi jumys formaty keń taralǵan AQSh, Ulybrıtanııa jáne Kanada azamattary baǵdarlamaǵa erekshe qyzyǵýshylyq tanytyp otyr. Óıtkeni Aıdyn Qapashevtyń aıtýynsha, Qazaqstanda turý jáne kúndelikti qyzmetterdi paıdalaný quny birqatar sheteldik memleketpen salystyrǵanda qoljetimdi.

– Bul uzaq merzimge keletin mamandarǵa baspana jaldaý, kólikpen júrý jáne kúndelikti qajettilikterge jumsalatyn shyǵyndy azaıtýǵa múmkindik beredi. Sondaı-aq tsıfrlyq kóshpendiler úshin ınternet sapasy da mańyzdy. Qazaqstanda tsıfrlyq jáne qalalyq ınfraqurylym qalyptasqan, al iri qalalarda qashyqtan jumys isteýge qajet baılanys pen qyzmetter qoljetimdi, - dedi ol.

Sonymen qatar ol sheteldik mamandar elde qaýipsiz jaǵdaıda turyp, jumysyn jalǵastyra alatynyn da eske salyp ótti.

– Neo Nomad vızasynyń ıeleri Qazaqstanda bir jylǵa deıin bolyp, osy aralyqta elge birneshe ret kirip-shyǵýǵa quqyly. Olar Qazaqstanda júrgenimen, sheteldik jumys berýshide jumys isteýin nemese sheteldegi tapsyrys berýshilerge qyzmet kórsetýin jalǵastyra beredi, - dedi Aıdyn Qapyshev.

Sondaı-aq ol tabıǵı jáne týrıstik oryndardyń kóptigi de baǵdarlamanyń artyqshylyqtarynyń biri sanalatynyn atap ótti. Tsıfrlyq kóshpendiler jumystan bos ýaqytynda taýly aımaqtarǵa, ulttyq parkterge, kólder men kýrorttyq óńirlerge saıahattaı alady. Osylaısha olar jumys pen saıahatty qatar alyp júrýge múmkindik alady.

– Neo Nomad vızasy týraly aqparat shetelde birneshe arna arqyly taratylady. Ony Syrtqy ister mınıstrligi Qazaqstannyń basqa memleketterdegi elshilikteri men konsýldyqtary arqyly nasıhattaıdy. Týrızm salasyna jaýapty mınıstrlik te eldiń týrıstik múmkindikterin tanystyrý kezinde osy baǵdarlama týraly málimet beredi. Vızaǵa qatysty aqparat resmı ınternet-resýrstarda jarııalanyp, sheteldik naryqtardaǵy aýdıtorııaǵa jetkiziledi. Qashyqtan jumys isteý keń taraǵan AQSh, Ulybrıtanııa jáne Kanada azamattarynyń qyzyǵýshylyǵy joǵary ekeni baıqalady, - dedi komıtet tóraǵasynyń orynbasary.

Ol baǵdarlama jaqynda iske qosylǵandyqtan, ázirge ony túbegeıli ózgertý josparlanbaǵanyn atap ótti. Aldymen vızany qoldaný tájirıbesi zerttelip, qoldanystaǵy tetiktiń tıimdiligi baǵalanady. Taldaý nátıjesine qaraı baǵdarlamany jetildirý, sheteldegi aqparattyq jumysty kúsheıtý jáne Neo Nomad vızasynyń tanymaldyǵyn arttyrý máseleleri qaralýy múmkin. Alaıda komıtet tóraǵasy orynbasarynyń aldaǵy jyldary Qazaqstanǵa qansha tsıfrlyq kóshpendini tartý kózdelip otyrǵany jóninde naqty kórsetkishi ázirge bekitilmegen.