Jańa reglament: Quryltaı depýtattary qaı laýazym ıelerine saýal joldaı alady
ASTANA. KAZINFORM – Depýtattyq saýalǵa jaýap bir aıdan aspaıtyn merzimde berilýge tıis. Bul týraly búgin elordada Quryltaı Reglamentin qabyldaý kezinde depýtat Snejanna Imasheva málim etti.
- Reglamenttiń mańyzdy bóligi Quryltaıdyń Konstıtýtsııalyq Sotpen, Úkimetpen jáne Qazaqstan Halyq Keńesimen ózara is-qımylyna arnalǵan. Onyń ishinde Konstıtýtsııada jáne zańdarda kózdelgen máselelerdi qaraý rásimderi belgilenedi. Quryltaıdyń quzyretine jatatyn asa mańyzdy máseleler boıynsha tyńdaý ótkizý kózdelgen. Parlamenttik baqylaýdyń asa mańyzdy tetikteriniń biri – Úkimet saǵaty. Onyń aıasynda depýtattar Úkimet ókiliniń baıandamasyn tyńdaıdy, odan keıin bas komıtettiń qosymsha baıandamasy jasalady, depýtattar suraq qoıyp, talqylaý júredi. Nátıjesinde tıisti usynymdar qabyldanady, - dedi S. Imasheva Quryltaıdyń jalpy otyrysynda.
Sonymen qatar ol depýtattyq saýal ınstıtýty reglamenttelgenin aıtty. Depýtat Premer-mınıstrge, Úkimet múshelerine, birqatar basqa memlekettik organdardyń basshylaryna jáne óńir ákimderine saýal joldaýǵa quqyly.
- Depýtattyq saýalǵa jaýap bir aıdan aspaıtyn merzimde berilýge tıis. Depýtat talabymen jaýap Quryltaı otyrysynda tikeleı jarııalanyp, qosymsha suraqtar qoıýǵa jáne talqylaý júrgizýge múmkindik beriledi. Osylaısha, Reglament parlamenttik dıalog pen baqylaýdyń birneshe túrin kózdeıdi: depýtattyq saýal, depýtattyq suraq, Úkimet saǵaty, tyńdaýlar, sondaı-aq Úkimetpen ózara is-qımyldyń arnaıy rásimderi (PM baıandamasy, Úkimet múshesiniń esebi), - dedi depýtat.
Budan buryn habarlanǵandaı, Quryltaı otyrystary ótetin apta kúnderi bekitildi.
